Un avion di e Forsa Aereo di Nigeria a bombardia, pa eror, un campo di refugiadonan cerca di Rann. E incidente aki a laga un saldo di 52 persona morto y 120 herdido, segun e organisacion humanitario Docternan sin Frontera.
Un oficial di gobierno di e estado di Borno, cu tabata yudando e coordinacion di evacuacion di e heridonan via helicopter, a bisa e agencia AP cu e cifra di mortonan ta cerca di 100 persona.
Algun di e victimanan tabata trahadonan humanitario. Seis di nan tabata pertenece na Cruz Cora Internacional.
Presidente di Nigeria, Muhammadu Buhari, kende su ehercito ta hibando un lucha contra di militantenan extremista di Boko Haram, a expresa su consternacion y a pidi pa calma.
E atake a tuma luga cerca di e frontera cu Camerun, unda e ehercito di Nigeria ta hibando un ofensiva final contra di Boko Haram.
Ta prome biaha cu ehercito Nigeriano ta admiti di a comete un eror manera esaki.
Boko Haram a causa destruccion na e region mas pobla di Africa door di bombardeonan, asesinato y secuestro
Boko Haram actualmente ta luchando pa deroca e gobierno y establece un Estado Islamico.