Futbol di Aruba conoce hopi baluarte, hungadonan cu un carera bunita den e deporte Rey. Arubaanse Voetbal Bond (AVB) ta dedica cada Campeonato di division di honor na un of mas di e personanan cu a y ta hunta un rol importante den historia di futbol na Aruba.
Recientemente AVB a anuncia cu a scoge pa e temporada 2016-2017 pa honra cuater hende homber cu a destaca den y a contribui grandemente na e deporte aki.
Nan ta Monico (Theo) Ruiz, Alberto (Beto) Peña, Ricardo (Cadochi) Kock y Frans “Fan” Dijkhoff. Ta un honor y placer pa AVB por conta cu nan influencia y e “stempel” cu cada uno a pone riba futbol na Aruba, cada un di nan haciendo contribucionnan valioso durante di e tantisimo añanan cu nan ta hungado futbol. No solamente nan teamnan a disfruta di nan talento, pero como miembro di e seleccion di Aruba y hasta den seleccion di Antia Hulandes, nan talento a yuda hiba e deporte dilanti pa un publico mas amplio y nan a inspira hobennan pa sigui den nan pasonan. AVB ta comparti un poco di e carera di cada un di e baluartenan aki cu comunidad di Aruba.
Monico (Theo) Ruiz
Theo Ruiz a cuminsa hunga futbol cu e team di Real Koyari cu 9 aña di edad. Cu su 11 aña el a bira miembro di e team aspirant di SV Bubali y cu 13 aña a bay hunga pa e team di junioren. SV Bubali a bira campeon di Aruba 4 biaha y 1 biaha sub campeon den e temporada cu el a hunga den e team aki.
Durante varios aña Theo a forma parti di e seleccion hubenil di Aruba. Na 1976 el a forma parti di e seleccion di Antia Hulandes y a subi di categoria pa e seleccion di hoofklas di Aruba. Como miembro di e seleccion hoofdklas di Antia Hulandes, Theo Ruiz a hunga diferente torneo internacional den Caribe, Centro y Sur America.
Cu SV Bubali Theo a logra un titulo di campeon di Aruba (1975) y un titulo di sub campeon (1986) y cu SV Dakota, el a bira campeon (1983) y sub campeon di Aruba y di Antia Hulandes (1984). Theo tambe ta conoci riba cancha di futbol di sala. El a forma parti di Fermins Boys y na 1994 a nombr’e Deportista di Aña di Futbol di Sala pa e organisacion cu ta dirigi futbol di sala, esta Fefusa. Keto bay Theo Ruiz ta activo riba tereno, hungando den e division Veterano cu e team di Bubali Chipi Chipi.
Alberto (Beto) Peña
Beto Peña (1931) a cuminsa hunga futbol na un edad relativamente hoben den bario di Santa Cruz. Hunto cu otro hobennan el a lanta e prome team, esta Jong Santa Cruz. Despues el a forma parti di otro teamnan, incluyendo Trappers, Jong Hollanda, Holandia, Santa Cruz Sport Union y Aruba Juniors. Como miembro di Aruba Juniors el a cuminsa forma parti di e seleccion di Aruba y a hunga tambe weganan interinsular. Na aña 1955 Beto a forma parti di e seleccion di Aruba cu a hunga e torneo Copa CCCF (awendia CONCACAF) unda Aruba a keda na di 5 luga. Beto tabata hunga korfbal tambe cu e organisacion SV Volvox, cual el a presidi pa diferente periodo. E tabata miembro di directiva di SV Estrella y a forma parti di e comision di carnaval di Club Caiquetio.
Ricardo (Cadochi) Kock
Prome cu Cadochi tabatin 15 aña ya el a subi pa hoofdklas na aña 1963 cu San Nicolas Jrs. Na 1966 el a hunga pa e seleccion di Aruba den division junioren y den e prome Weganan di Reino como miembro di e seleccion di Antia Hulandes U19. Un aña despues el a bolbe forma parti di e seleccion di Antias pa Weganan di Reino, caminda e ekipo a logra medaya di oro. El a forma parti tambe di e seleccion grandi di Aruba y esun di Antia. Hunto cu e ekipo di Antia el a hunga e weganan eliminatorio pa Weganan Olimpico. Na aña 1968, Cadochi a uni na RCA; despues el a bay traha den casino y a sigui hunga pa RCA so. Hunto cu e tricolornan di Solito el a logra varios titulo. Na 1978, el a sali Hungado Mas Valioso di e campeonato. Algun di e weganan cu Cadochi ta considera mas importante p’e tabata e weganan contra Feyenoord; Botafogo, Brazil; Deportivo Portugues, Venezuela; Saprisa, Costa Rica y Defence Force di Trinidad. Na aña 1981, Cadochi a cuminsa traha como comentarista di futbol hunto cu Janchi Tromp y pues e aña aki ta cumpli 35 aña trahando den prensa deportivo.
Francisco Dijkhoff
Francisco Dijkhoff ta naci na Aruba dia 30 November 1952 na Papaya, na Tanki Leendert. Na edad jong el a cuminsa bay tereno di F.C.Tropical cu su ruman +Toni y practica futbol cu e muchanan di junioren y reserve. Despues di a regresa di Hulanda, el a bira miembro di Teachers United, unda cu ora cu no tabatin referee, e mes tabata dirigi e wega. Su colega di John F. Kennedy School, Norman Brown, a urgi’e pa bira miembro di A.V.B. A aserk’e pa dirigi weganan di division dos pa A.V.B. riba tereno di Universal, Sport Boys y Dos Caminos tur diadomingo atardi. Hunto cu +Nito Rosel y +Fan Dijkhoff a dirigi hopi wega den Joe Laveist Sport Park diabierna anochi. Na 1988 el a bay duna les na Milton Peters College Sint Maarten. Ora a regresa di Sint Maarten directiva di AVB bou presidencia di +Boei Marchena a forma un comision hunto cu Oslin Toppenberg y Aubrey Maduro pa inventarisa e retonan den e cuerpo di referee y trece solucion pa directiva. Di e momento ey na 1991 e ta envolvi cu refereenan di AVB.
Na aña 2001 a bira miembro di directiva di AVB cu Nilo Croes como Presidente. Na januari 2002 hunto cu Marcelo Croes a bay un curso pa bira KNVB Scheidsrechter Instructeur na Corsou. Na aña 2003 a bira Match Commissioner y Referee Inspector di FIFA, CONCACAF y C.F.U. Hunto cu Gregory Engelbrecht a organisa futbol femenino den e era moderno pa AVB . Na 2005 FIFA a bin cu un exigencia cu cada federacion miembro mester tin den nan sede un Referee Department, pa cual hunto cu Archi Maduro y Ivo Valdez a muda un oficina di AVB for di Stadion Guillermo P. Trinidad pa Technical Center Angel Bota y riba e porta a plak un papel REFEREE DEPARTMENT. Entre aña 2005 pa 2013 Francisco Dijkhoff tabata AVB Head of Referee. E ta orguyoso di mira refereenan cu a sali for di cursonan cu el a duna y awe ta riba lista di FIFA y tambe algun di su ex alumnonan di scol cu a sigui e trabou di referee, manera Oshi Kock, Rudy Angela, Gregory Odor, Eugene Faro y Ismael Matos.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.