Diabierna 12 di Mei a inicia campeonato HEINEKEN official di Aruba Softball Bond den 3 Liga tanto AA Femenino y A-Klas y AA Masculino. E campeonato e aña aki ta wordo dedica na dos baluarte kendenan a dedica hopi na e deporte di softball. Sra. Bertha Wolf-Croes y Eugenio Bertrando miho conoci como “Tan” Helder. Awe nos ta repasa en corto e biografia di Sr. Tan Helder. Tan a cuminsa hunga Little League na 1960 pa Gibson bou encargo di manager Julio v/d Biezen miho conoci como Jul. Despues Tan a milita den ekipo Peterschoen miembro di ASB y a sigui pa Sibone den categoría AA. Despues cu Tan a tuma un break di 3 aña Tan a continua su carera cu e ekipo di Wonco bou maneho di Frans Croes (q.e.p.d) y a logra hunga diferente biaha den Play Off. Tan ta continua hungando fast pitch pa Kibaima ekipo di su bario cual despues a bira Frisian Flag un ekipo cu a titula campeon hopi aña entre otro un record e tempo aya di 5 aña consecutivo campeon AA. Tan tabata un catcher estelar. Tan mas na grandi a keda activo y a hunga softball slowpitch cu diferente ekipo entre otro Kibaima, CMB, Hospital, Tele Aruba, Astros y ultimo cu Tanki Leendert Giants. Den softball veterano ya na un edad mas grandi Tan a hunga pa La Moderna Sluggers bou di maneho di Juan Tromp. Aruba Softball Bond orguyosamente ta dedica campeonato 2017 na honor di Eugenio Bertrando “Tan” Helder como muestra di aprecio pa tur su añanan di dedicacion na nos deporte di softball. Pabien na Tan y henter famia. Merecidamente Tan Helder un baluarte ehemplar.