Teamnan di Aruba North Little League (ANLL) cla pa campeonato den categorianan di Junior y Senior.
E Campeonato di Aruba Little League (ALL) ta ranca sali diasabra 13 di januari cu e categorianan di 13-14 aña (Junior) y 15-16 aña (Senior). E campeonato lo wordo hunga “landelijk” y e prome wega ta inicia pa 9:30am entre e ekiponan di Hammersharks vs. Stars na Nadi Croes/Crismo Angela na Santa Cruz. Weganan di prome round lo tuma luga na e veldnan di Joe Laveist Sport Park y Nadi Croes/Crismo Angela na Santa Cruz. Cu e inicio di e temporada nobo aki ta nace tambe un speransa nobo pa seleccionan di Aruba por competi na Taylor, Michigan (Junior) y Bangor, Maine (Senior). Recordando e logro grandi di e seleccion di Aruba na 2010 cu a logra e titulo di campeon den Senior League World Series Championships na Bangor derotando e ekipo di Bangor All-Stars 8-1 den Mansfield Stadium yena cu 3 mil fanatico.
Aruba (North) Little League kier a invita e pueblo di Aruba pa bin apoya nos hobennan cu ta trahando pa e Campeonato di Latino Americano cual lo tuma lugar na Aruba e aña aki mes! Ta hasi un yamada na e comunidad di Aruba pa inscribi tur mucha di edad 4+ cu ainda no ta practicando e deporte di baseball pa trece e muchanan y laga nan cuminsa train den Januari. E programa di Little League tin como lema: caracter, curashi y lealtad y ta ofrece un cantidad grandi di experiencianan unico y benefisioso pa nos muchanan y nos comunidad. Cuminsa informa awe mes di teamnan den bo bario y trese e yui, nieto/a, subrino/a y bisiña pa hasi su promesa.