CARACAS, Venezuela- E Conseho Nacional Electoral (CNE) di Venezuela a duna inicio na e campaña electoral pa e aspirantenan na presidencia di e e pais Latinoamericano aki.
Pa medio di un comunicado, e Poder Electoral Venezolano a specifica cu e campaña lo dura desde diadomingo 22 di april te cu mei anochi di diahuebs 17 di mei, cual ta tres dia prome cu eleccion.
Den e 26 dianan di campaña, e cinco candidatonan (niun hende muhe ta figura como aspirante) y nan partidonan politico por dispone te cu cuater minuut diario den e espacionan televisivo di señal habri y un maximo di cinco minuut di propaganda na emisoranan di radio na nivel nacional of regional. Esakinan ta e aspirantenan na e presidencia di Venezuela:
Nicolás Maduro Moros
E actual mandatario di Venezuela (55 aña) a cuminsa su careda pa eleccion den e estado Bolivar, sur di e pais. Eynan el a expresa cu “e campaña electoral aki ta pa libra nos di esunnan cu kier oprimi e pueblo”. Maduro ta wordo respalda pa e asina yama Frente Amplio de la Patria (FAP), un coalicion cu inclinacion iskierdista integra pa :
• Partido Socialista Unido de Venezuela (PSUV).
• Movimiento Somos Venezuela (MSV).
• Movimiento Tupamaro (MT).
• Unidad Popular Venezuela (UPV).
• Podemos, Patria Para Todos (PPT).
• Organización Renovadora Autentica (ORA).
• Movimiento Político Alianza Para el Cambio (APC).
• Movimiento Electoral del Pueblo (MEP).
• Partido Comunista de Venezuela (PCV).
Un di e basenan fundamental di su discurso ta di caba cu e “guera economico multiforme ehecuta pa e sector di e burguesia nacional y internacional pa sabotia e pais”.
Ademas, Maduro a anuncia un comienso nobo y un “renobacion di e Revolucion Bolivariano”, sigurando cu e lo gana eleccionnan cu 10 miyon voto, un cifra cu tin un nificacion importante pa Chavismo, ya cu esaki tabata e aspiracion di Hugo Chavez, cu nunca el a alcansa.
Henri Falcon
E ex gobernador di estado Lara (56 años), un teritorio ubica den e parti centro -occidente de Venezuela, ta un politico cu a distancia su mes di Chavismo pa bay contra di nan desde e coalicion opositor Mesa di Unidad Democratica (MUD).
E ta presenta den e campaña presidencial anunciando un gobierno di salvacion nacional y cu ta wordo respalda pa partidonan politico cu a bandona MUD:
• Avanzada Progresista (AP).
• Movimiento Al Socialismo (MAS).
• Comite di Organizacion Politico Electoral Independiente (Copei; mas conocido como Partido Socialcristiano).
Falcon a cuminsa su campaña na Caracas, capital di e pais, presentando un programa di gobierno unda ta destaca: dolarisacion di e economia Venezolano, reconstruccion economico, participacion politico amplio y creacion di un miyon di empleo.
E ex gobernador a bisa cu e ta impulsa un “reinstitucionalisacion di Estado”, e lo libera e presonan cu oposicion ta reclama como “politico” y ta garantisa un “autonomia di podernan publico”.
Javier Bertucci
Exlíder religioso (48 aña) y e prome di e contricante di Maduro cu a inscribi su candidatura presidencial. E tabata fundado y director nacional di e asociacion civil Cristian El Evangelio Cambio y pastoor di Iglesia Maranatha. Ademas, e ta un empresario liga na e sector petrolero nacional.
Bertucci a inicia su campaña na Yaracuy, na 300 km di Caracas, concentrando si siguidonan den un avenida importante di San Felipe, ciudad importante di e estado aki. E ex pastoor ta wordo respalda pa un grupo denomina Speransa pa E Cambio (EEC). Como propuesta di gobierno ta destaca:
• Atencion integral na e necesidadnan basico (alimentacion, servicionan publico, vivienda, educacion y siguridad social).
• Rescate di e industrianan basico
• Creacion di un marco legal confiabel pa inversionistanan nacional y stranhero
• Reimpulso di e sector turismo.
• Restructuracion di e sistema educativo.
• Modernisacion di e sector salud.
Bertucci, ademas, a califica e Mesa di Unidad di “egoísta” , pa nan yamada na abstencion, ya cu esey nan kier pretende di reduci e derecho na voto di ciudadanonan.
Reinaldo Quijada Cervoni
E tabata co-fundado di e Frente Patriotico, un agrupacion cu a apoya Hugo Chavez abiertamente despues di e rebelion militar di 1992. Sin embargo, na 2013, despues di e morto di Chavez, Quijada a bandona e idea di participa den e gobierno di Nicolas Maduro. Asina tambe, na 2015, el a funda e partido Unidad Patriotico Popular 89 (UPP89), cu cual e ta aspira na presidencia di Venezuela.
E oferta di gobierno di e candidato Reinaldo Quijada (59 aña) ta draai rond di dos tema fundamental:
• Recuperacion di e institucionnan di estado
• Restablecimento di e aparato productivo nacional.
Luis Alejandro Ratti
Ta trata di un empresario (39 aña) trata de un empresario (39 aña) cu ta yama su mes “activista” den e area di papeleria. El a milita den e area hubenil di Movimiento Al Socialismo (MAS) y a participa den e fundacion di Podemos. Awo e ta presenta su mes como candidato presidencial riba su mesun iniciativa, es decir, sin partidonan politico cu ta respald’e.
E ta defini su mes como un candidato alternativo capas di trece un parti grandi di e votantenan, cansa di e politica tradicional cu, na su opinion, a causa e polarisacion di e habitantenan di e pais. Pa e motibo ey, e ta considera cu e ta unico via cu e por tin pa wordo acepta dor di e pueblo.
Den varios encuentro cu prensa, Ratti a propone libera e control di cambio y ekipa e moneda nacional (bolivar) cu dollar Mericano, pero e no ta kere di e dolarisacion di e economia. Ademas, e ta calcula cu ta haci falta pa recupera e inversion priva como fuente di reactivacion economico.
E falta di makinaria electoral, Luis Alejandro Ratti ta compensa cu e uzo di rednan social, unda su siguidonan ta bin hunto bou di e consigna ‘Reto de Valientes’, den referencia di esunnan cu ta compañe den e recoridonan den varios comunidad di e pais.
Electornan
Mientras tanto, e pueblo votado Venezolano ta dividi den tres grupo grandi, según e analisis cu e academico German Campos, director di e compania Consultores.
E gruponan aki, den parecer di Campos, lo por wordo defini como:”esunnan cu ta spera e fracaso electoral, esunnan cu ta na margen di e proceso y esunnan cu lo bay participa buscando un consolidacion di e actual proceso politico of e fin di esaki.
Esunnan cu ta bet pa e fracaso como resultado di e eleccion presidencial, “ta forma parti di e sector di e poblacion cu ta move den funcion di e insiguridad internacional y no pa e capacidad di e Venezolano pa resolve nos mesun problema of e problemanan di e pais”, e empresario, cu doctorado den Political Cience, a bisa.
Di otro banda, segun Campos, tin esunnan cu ta mantene nan mes na e margen di e eleccion presidencial cu, cualkier cu sea e resultado, “lo no afecta su situacion economico of social”.