WASHINGTON D.C., Merca – E campaña di e candidato Democrata pa Cas Blanco, Hillary Clinton, a respalda diasabra e decision di autoridadnan di Wisconsin di haci un recuento di voto, aunke cu no a bisa di a detecta iregularidadnan durante e eleccion di dia 8 di November, gana pa e Republicano Donald Trump.
“Dado cu nos no a haya prueba di pirateria informatico of intentonan externo di altera e tecnologia electoral, nos no tabata tin planea pa eherce e opcion aki, pero awo cu a cuminsa un recuento na Wisconsin, nos ta pretende na participa pa garantisa e debido proceso di modo cu e ta husto pa tur parti,” e consehero general di e Campaña di Clinton, Marc Erik Elias a sigura.
Wisconsin, un di e estadonan gana pa hopi poco margen pa Trump, vencedor di e eleccionnan di dia 8 di November, a anuncia diabierna cu nan lo haci un recuento di voto atendiendo na e peticion di otro dos candidato minoritario, esun di e partido Berde, Jill Stein y esun independiente, Rocky Roque De La Fuente.
E comision Electoral di Wisconsin, unda cu Trump a impone riba Hillary Clinton pa un poco mas di 20 mil voto, a anuncia cu “nan ta preparando pa procede cu un recuento estatal di e votonan pa e presidente di Merca,” di acuerdo cu loke a wordo solicita pa Stein y De la Fuente, segun su administrador, Michael Haas a anuncia.
“Si Jill Stein procede cu lokel a priminti y (tambe) pidi recuento na Pennsylvania y Michigan, nos lo bay haci mesun cos den e dos estadonan aki,” e hefe di e organisacion “Hillary for America”, encarga cu e campaña di Clinton a agrega den un comunicado.
Elias a sigura cu nan ta “totalmente conciente cu e cantidad di voto cu ta spera Donald Trump y Hillary Clinton den e estado caminda cu e diferencia ta menor (Michigan), ta excede e margen mayor nunca supera den un recuento”, pero ainda asina ta considera “importante” ta representa.
Na Michigan e candidato democrata a perde contra Trump unicamente pa mas of menos 10 mil voto, mientras cu na Pennsylvania e diferencia na fabor di e empresario hotelero ta di mas of menos 71 mil voto.
Segun e Comision Electoral di Wisconsin, e recuento lo cumisa siguramente na final di e proximo siman, “despues cu e campaña di Stein a paga e cuota” necesario cu “ainda ta wordo calcula,” Haas a agrega.
E candidato di e Partido Berde, cu na Wisconsin a haya 31 mil voto, a recauda casi 5.8 miyon di dollar pa financia e recuento y e cantidad ey ta alcansa pa paga esun di e estado ey y di Pennsylvania.
E obhetivo di Stein ta pa yega 7 miyon di dollar pa por cubri tambe e revision na Michigan.
Ley di Wisconsin ta obliga e candidato solicitante na sufraga e recuento si e diferencia pa loke el a perde ta supera un 0,25%.
Stein tambe ta propone presenta peticionnan pa haci un recuento di escrutinio na Pennsylvania y Michigan, estado caminda e ultimo aki unda e resultadonan ta pendiente di e certificacion final.
Di acuerdo cu e campaña di e candidato Berde, tin pruebanan ‘convincente” di “anomalianan” den votacion den e tres estadonan aki y pesey, ta necesari verifica fundamentalmente e resultado di e condadonan cu ta depende di mashinnan di sufragio electronico.
Fuente: NTN24