ISTANBUL, Turkia – E camarografo Hulandes, Bram Jansen di e agencia di prensa Associated Press, a wordo aresta diadomingo. Jansen a filma e aresto di e participantenan di e Istanbul Pride Parade, ora cu na e momento ey a wordo aresta.
Esaki e coresponsal di NOS, Lucas Waagmeester a meld riba Twitter.
Segun Waagmeester, Jansen tabata para entre prensa y e demostrantenan pa asina filma e arestonan. El a mustra polis su credencial Turco, pero asina mes el a wordo hiba. Riba e rason di su aresto ainda no ta conoci.
Gay Pride na Istanbul ta un evento cu pa e aña aki pa di tres biaha consecutivo ta wordo prohibi pa autoridad – nan ta bisa cu nan kier mantene orden publico y siguridad.
“E unico rason berdadero door di e reaccionnan aki pa un marcha cu pa 12 aña largo ta tumando luga, ta odio,” un vocero di e organisacion a bisa diadomingo. “Nos siguridad no por wordo garantisa door di cera nos tras di muraya si nan puntra nos pa nos sconde nos mes. Nos siguridad no lo wordo garantisa door di nos, si e no wordo reconoci den e constitucion, door di sigura husticia, igualdad y libertad.
Homofobia
Aune cu homosexualidad na Turkia no ta prohibi, homofobia ta keda un problema. Segun criticonan presidente Tayyip Recep Erdogan y su partido Islamita AK, no ta mustra mucho interes riba e expansion di e derecho di minoria, e comunidad LGBTI y muhenan.
Apesar cu e prohibicion, na varios luga na Istanbul tabata tin activistanan riba caya. Polis a uza gas lagrimogeno pa plama nan for di otro. Segun e activistanan tambe a haci uzo di balanan di rubber.
Fuente: www.nu.nl