Presidente di Comision di e- commerce Sr. Randal Croes di KvK ta splica cu esaki ta un tema hopi papia pa por cuminsa haci negoshi na Aruba tambe pa loke ta e benta di online. Tabata tin un reunion bastante interesante na Banco Central y a elabora e exploracion di e idea di E- commerce, pa wak ki utilidad Kamer tin pa promove E- commerce na Aruba. Nos tur ta contribui na E- commerce si bo ta cumpra via internet cu creditcard.
Segun Sr. Croes lo ta hopi bon si aki na Aruba lo por tin un tienda local, cu por wordo ofreci localmente, entrega localmente y paga via computer of via telefon. Esey ta en corto E- commerce. E bentaha ta cu por pone e warehouse unda cu ta na Aruba, por trece mercancia di afo y ta participa den Comercio sin tin nodi tin gastonan asina grandi, y ta competi cu website nan di exterior.
Bentahanan cu e sistema aki tin, nos tin nan un poco stroba na aruba, pa existi pasobra uno, no tin creditcard na florin. Di dos no por uza debitcard pa paga online. Mester por logra cu e atm- machine cu tin hinca den e tienda ta drenta den e computer. Un tienda cu ta bende paña of sapato, via su website bende su mesun productonan cu un hende cu por deliver esakinan na un bon prijs. Mas cu bende online, mester menos showroom.
Sr. Croes ta sigui splica cu na Aruba, ainda no tin leynan cu ta regulando esaki ainda. A wordo papia hopi riba esaki. Di parti di Camara di Comercio ta pidi partidonan politico, den e eleccion aki pone e E- commerce y crea e posibilidadnan di E- commerce, stimula y motiva esaki den leynan den un sistema financiero pa e bin existi na Aruba, pa oportunidadnan por habri pa hopi hende. No solamente bende localmente, hasta por bende desde Aruba si ta specialisa den algo di balor halto, size chikito, piesa di celular of acesorio di celular. Ta bende localmente, pero si un hende for di Corsou cumpra for di bo, esaki ta habri oportunidadnan.
Na Aruba ya ta miyones di florin, ta wordo cumpra for di Amazon, Ebay, Alibaba. Ta cumpra mercancianan comercial, paña, sapato, etc. Nan ta bendiendo caba for di E-commerce. Y Aruba ta kedando afo, ya cu no tin e plataforma aki. E plataforma ta, manera Sr. Croes a splica caba cu por uza e atm card via e sistema local na florin pa cumpra y paga.
Un noticia importante di parti Banco Central, ta bisa cu nan no ta parando niun iniciativa di ningun banco ni institucion local pa implementa un sistema di pago. No tin ningun strobacion ni obstaculo legal. E ta completamente liber pa un hende bin cu sistema cu ta funciona conecta na e banconan na otro. Of e banconan mes, topa cu otro y bin cu un sistema. Asina Sr. Randal Croes, presidente di Comision di E-Commerce pa Camara di Comercio a splica.
Camra di Comercio ta haci un apelacion na banconan local pa papia cu otro y pa algun entrepeneur cu tin ideanan cu ta funciona na otro parti, bin cu esaki nan y implementa esaki na Aruba. E tendencia di futuro ta pa cumpra mas for di internet. Pakico ta sigui cumpra for di websitenan di afo, perhudicando nos entrepeneurnan. Di parti Sr. Croes a yega ora pa trece haci e tema di online shopping un negoshi legal paso nos mester cuminsa pensa riba e direccion aki tambe. Mester tin leynan cu ta protege esun cu ta cumpra y esun cu ta bende. Tin varios iniciativa for di 2001 y ta pidi e partidonan politico pa sak’e for di den lachi, kita stof for di dje, pone riba programa como prioridad. Siglo 21 a yega y nos mester pone economia di Aruba up to date.
Tabata tin iniciativanan di ley cu a wordo diseña caba cu lo tin di pushanan mas duro pa nan pasa Directie Wetgeving pa wordo pasa na Parlamento. Y si no, ta wak pa tur partido politico ta wak pa nan tin’e bon hinca den nan programa. Si no logra uno, lo logra e otro.
Camara ta prefera cu Arubiano competi cu Arubiano y no laga e competencia di afo drenta nos mercado. Ta prefera pa un tienda local tin su branch di E- commerce. Si bo tin e alternativa ey den e negoshi, tin dos negoshi cu por biba di dje. Un hende ta prefera di click, enbes di paga parking of e no tin auto.