Diabierna 4 di November ultimo Camara di Comercio y Industria Aruba (KvK) a tene e apertura oficial di su di cuatro exposicion di arte. Cu e meta pa duna un aporte na artistanan local, e exposicion aki ta reemplasa e exposicion “Un mundo di diferente color” di sr. Reginald de Palm cu a keda exponi durante un aña na KvK.
Como artista local e aña aki a toca turno na sra. Elizabeth Puente-Badell cu a presenta su obranan di arte hibando e tema “Serendipia”. Sra. Puente-Badell di origen Venezolano y cu desde 1993 ta considera Aruba como su cas, ta splica cu e gusta crea arte uzando diferente tipo di material y ta semper experimenta en busca di cosnan nobo. Asina e ta purba desaroya su tecnica y alabes ta combina su pasion di expresa su mes den su cuadranan den combinacion cu duna workshop y siña su studiantenan e bunita arte expresivo cu ta pintamento.
E apertura di ‘Serendipia’ a conta cu presencia di varios empresario y interesadonan cu a bin pa admira e arte, cu por cierto lo keda exponi pa un aña largo na Camara di Comercio. E diabierna anochi aki tabata sigur uno hopi ameno caminda e bishitantenan a disfruta di snacks y bebida mientras nan por a aprecia e exposicion cu ta dorna e area di recepcion di KvK. Durante e anochi aki ya caba tabatin interes di coleccionistanan pa cumpra algun di e obranan di sra. Puente-Badell.
KvK kier informa cu durante e prome kwartaal di 2017 sra. Puente-Badell lo organisa un workshop special pa empresarionan caminda cu nan lo siña di e beneficionan mental e.o. relaha y creatividad door di pintamento. Keda pendiente pa esaki!
Camara di Comercio ta gradici sra. Puente-Badell pa acepta e invitacion y exhibi su obra di arte den nos edificio y ta invita un y tur pa pasa libremente durante oranan di oficina, di dialuna pa diabierna, entre 8:00 AM y 4:30 PM pa admira e pinturanan. Alabes KvK ta gradici tur cu a bishita e apertura di e exposicion.
Esnan interesa pa haya mas informacion tocante e posibilidad pa exhibi nan arte na KvK por manda un e-mail pa: [email protected].