Diamars mainta a tuma luga e caso caminda e grupo di Alonso Tromp y demas hendenan cu ta forma parti di e bestuur nobo di e partido Democracia Real. E grupo aki a dicidi na cuminsa cu un procedura contra di Camara di Comercio, pasobra Camara di Comercio no a voer in e cambionan di e miembro di bestuur manera cu a wordo pidi.
Abogado defensor di Sr. Alonso Tromp, mr. Sven Faarup a cuminsa su pleidooi bisando cu Camara di Comercio a nenga di inscribi e directiva nobo, como esun legitimo di Partido Democracia Real. E co- fundadonan di partido Democracia Real tabata Sr. Alfonso Tromp, Sr. mr. Bikker, Sr. Deluvia y Sr. Vallejo Lopez.
Dia 15 di Januari 2017, Sr. Alonso Tromp a manda un mail pa miembronan di partido pa asina nan asisti na un Buitengewone Algemene Leden Vergadering, yama pa Sr. Tromp, pa asina forma un directiva nobo ya cu segun su parecer, Sr. mr. Andin Bikker no ta forma parti mas di e partido. Statuut di partido ta stipula, cu unabes bo ta simpatiza cu un otro partido, bo no ta forma parti mas di e partido aki.
Segun Sr. Tromp, semper e tabata forma parti di partido Democracia Real. Pero e directiva nunca a pidi contribucion, y tampoco nunca a stel vast e contribucion. Sr. mr. Faarup a pidi hues pa bisa KvK pa e directiva nobo di PDR wordo inscribi na Kamer van Koophandel.
Hues a puntra mr. Faarup, na ki momento un persona no ta miembro mas di Partido Democracia Real? Aki ta caminda cu mr. Faarup a bisa hues cu ta mr. Andin Bikker ta esun cu ta hanteer ken tin derecho di voto y ken no.
Sr. mr. Faarup, e esencia di e caso ta basa ariba dos punto principal, cual ta e banda di Sr. Tromp, unda ta keda e pregunta si e bestuur bieuw ta existi ainda y e di dos, si miembronan di PDR a haci lo correcto pa yama un Buitengewone Algemene Leden Vergadering, y esaki ta hues lo mester dicidi, ken ta directiva di PDR y ken no.
Hues lo dicidi dia 4 di Juli, pero kisas esaki lo ta strobanan di bay eleccion dia 22 di September. Pero si nan lo bay Colegio Electoral y brief nan in, di kico hues a bisa y e fecha cu e lo duna pa cu e caso aki. Na mas di un biaha hues a bisa e abogado di partido contrario cu e ta bay den ripiticion. Pero na opinion di Sr. Tromp, nan a bin Corte pa exigi derecho di existencia di Partido Democracia Real. Nunca nan a papia malo di Democracia Real y no ta interesa pa forma parti di otro partido, manera POR.
Por ultimo, Sr. Tromp a bisa na su votadonan den eleccion 2013 pa tene pasenshi y cu e ta sigur, cu hues lo haci su trabao debidamente y cu e ta sigur cu nan lo sali victorioso.