Mirando e desaroyo sumamente positivo cu e mundo di ahedres (schaak) Arubano ta pasando aden e ultimo añanan, logrando di crece enormemente den cantidad di practicante, specialmente bou di hubentud, pero tambe cu logronan grandi riba nivel nacional y internacional, a dicidi pa diversifica y alsa e nivel competitivo di ahedres na Aruba inaugurando un club nobo cu ta hiba e nomber “Caquetio Chess Club”.
Dialuna cu a pasa, esta dia 1 di Mei 2017, entre 4.00-6.00 pm, a inaugura e club nobo di e deporte ahedres, califica como e “Deporte Rey” di deportenan mental y alabes e di dos deporte mas practica na mundo despues di futbol. E Ceremonia di Apertura a consisti di e canto di e Himno di Aruba pa e hoben rumannan Mia y Jeshua McCollum, sigui pa discurso di e presidente FIDE Instructor sr. Maurits Dijkhoff y vice-presidente Candidate Master y FIDE Instructor drs. Raymundo Dijkhoff, mientras cu despues tabatin cortamento di cinta pa sra. Mireille St. Jago, docente di Scheikunde na Augustinus College y Colegio San Antonio. Una bes a corta cinta, tur esnan presente por a drenta e club nobo y admira su beyesa haciendo un brindis mientras sra. St. Jago a hunga e prome zet (movida) simbolicamente contra Mia McCollum di 8 aña. A parti bolo traha den forma di ahedres y snacks pa tur esnan presente, mientras cu despues di e parti formal por a hunga algun wega, conoce e club y su directiva miho, mientras cu sr. Evan Giel a percura pa deleita tur esnan presente cu musica suave.
Miembronan di directiva, banda di e presidente y vice-presidente ya menciona aki riba, ta: Secretaria sra. Marcia Lopez, Tesorero sra. Maureen Kelly, Comisario di Material sr. Jean-Pierre Lesire y Comisario di Asuntonan Social y Sponsorship sr. Roman Stetsenko. Tin un posicion mas cu lo ser tuma pa e presidente di e Comision di Mayor cual lo ser institui e luna aki.
Caquetio Chess Club ta ofrece e oportunidad na tur esnan cu kier of ta desea pa practica e deporte di ahedres cuminsando desde e edad di 6 aña. E Hala Hubenil ta organisa den un structura di academia, unda tin diferente grupo liga na e nivel y edad dje miembro cu lo ser guia y entrena pa su team di instructor cu ta consisti di: Jean Pierre Lesire, Dhruva Chatlani, Monica Bremo, FI Maurits Dijkhoff, WCM Zaily Arbona, CM Jomar Benschop, WCM Annelaine Jacobs y CM FI drs. Raymundo Dijkhoff. Lo tin les, training y practica competitivo cualnan lo tuma luga riba diabierna y diasabra pa e hobennan. E Seccion Abierto pa adulto (senioren) lo cuminsa na September di e aña aki cual posiblemente lo tuma luga riba diahuebs anochi.
Ademas di e parti deportivo, lo organisa eventonan social y educativo pa asina difundi e deporte di ahedres mas hopi posibel den comunidad Arubano y tambe pa crea un laso estrecho cu y entre su miembronan y tambe cu e sociedad Arubano en general.
E deporte di ahedres a origina 600 aña despues di Cristo na India y mirando e historia grandi cu e deporte aki tin, ta na su lugar cu Caquetio Chess Club ta situa den un cas historico ubica den Wilhelminastraat 105. Den mesun contexto, a duna e di dos club di ahedres na Aruba e nomber “Caquetio” pa duna realse na nos historia cultural.
Finalisando Caquetio Chess Club kier a duna un palabra grandi di gradicimento na e siguiente persona- y companianan/sponsor cu a duna nan aporte y sosten pa por a inaugura e club nobo aki: sr. Roman Stetsenko, sra. Maureen Kelly, sra. Marcia Lopez, sr. Jean Pierre Lesire, sr. Leonardo Castillon, sra. Ivy Karijodinomo, sra. Jolene Croes, sra. Haydee Boekhoudt, sr. Ronnie Croes, sra. Miri Gomez, sr. Eric y Jane Erasmus, sr. Jozef y Eufemia Gomez, Apriori Real Estate NV, Steffy Boutique, Denise Villanueva Dental Clinic, Horeca Technical Services, Aruba Climate Control, Johnson Notary Services, Tanki Leendert Copy Center y Click Print NV.