Doño di e truck di cuminda na Bushiribana, Sr. Edwin Boekhoudt, ta lamenta cu ta keda pinta riba e luga cu ta un parti di atraccion turistico. Sr. Edwin Mateo Boekhoudt di Happy Stop Truck na Bushiribana ta amplia mas ariba e tema aki.
Segun Sr. Boekhoudt, nos tur tin problema, pero no por resolve e problema ariba propiedad di Pais Aruba. Esaki ta di cuater biaha cu ta susha e luga aki, dos biaha cu verf di neon y dos biaha cu verf di awa. Y tur cuater biaha Sr. Boekhoudt a coopera pa haci e luga limpi sin cobra nada pa esaki.
E ta sigui splica cu e ta haci e luga limpi y tur e gastonan ta core pa su cuenta. Hopi biaha turistanan ta puntra si ta custumber di Aruba pa daña cu graffiti riba nos monumentonan. Sr. Boekhoudt ta enfatisa cu si e tin un problema e no por haci esaki door di crea otro problema, pero e ta bay directamente na husticia. Y si tin un sentencia, gusta of no, esaki mester wordo respeta. Te hasta ministernan ta respeta e decision tuma door di un hues.
Bushiribana ta un luga cu ta wordo masha bishita door di turistanan. Tin biaha Sr. Boekhoudt ta keda un poco mas laat atardi, pa siguridad di nos bishitantenan, ya cu tin hendenan cu ta pasa eybanda cu menos bon intencion. Pero mester tene cuenta cu no ta tur hende ta nos hendenan local, ya tin biaha ta turistanan mes ta horta di otro turistanan.
Sr. Boekhoudt ta enfatisa cu cada biaha tin un problema eynan, e ta yama autoridadnan policial cu ta responde masha lihe. E ta haci un yamada, como ciudadano di Pais Aruba, pa esun cu a pinta, cu su persona no por yuda esun cu ta pinta, y mucho menos e turistanan. Mester corda cu yiunan di esunnan cu ta pinta, un dia lo crece y kisas drenta den e mundo turistico. No ta tur hende por ta fout y mester resolve e problema cu e persona aki tin, na e caminda cu yama husticia, segun Sr. Boekhoudt.