AREQUIPA, Peru- Al menos 30 persona a muri y 17 otro a resulta gravemente herida diamars, ora cu e bus a bolter y cay den un abismo den e region di Arequipa, zuid di Peru, según fuentenan oficial a informa.
E accidente a tuma luga durante oranan di marduga di diaranson na altura di e kilometro 780 di e caretera Panamericana Sur den cercania di e brug Ocoña, den e localidad di Camana.
Presidente di Peru, Pedro Pablo Kuczynski, den un mensahe riba Twitter a afirma cu autoridadnan di biaha a activa tur protocol pa atende e emergencia aki.
“Condolencia na e famia di e victimanan di e accidente di trafico na Arequipa. Desde cu esaki a sosode, tur e procedimento pa apoyo inmediato di rescate y traslado di e victimanan pa centronan di salud mas cerca a wordo activa”, el a señala.
Según informacion, pa motibonan no conoci, den un bocht skerpi, di e caminda e carretera e bus a cay den e abismo di 200 m, te casi yega na e rand di rio Ocoña.
Den e bus tabata tin al menos 15 mucha, aunke ainda no ta conoci e cantidad total di pasahero, ya cu al parecer el a recoge varios persona riba e ruta.
Na e luga di e sucedido a yega Cuerpo di Rescate di bomberonan boluntario, Polis nacional y ekiponan medico, y a instala un puente aereo pa traslada e heridonan di mayor gravedad pa hospitalnan di e provincianan den cercania.
Gerencia Regional di Salud di Arequipa a señala na e emisora RPP Noticias cu ocho di e heridonan a wordo hiba pa e capital di e region Sureño aki.
Fuente: https://www.efe.com