Recientemente a tuma luga e campeonato ‘XXXII Senior Pan American Karate Championship’ na Santiago, Chile unda e karateka Kevin Lugo, coach ‘sensei’ Alberto Gonzalez Lujan y arbitro ‘sensei’ Jose Vivas a representa Aruba.
E tabata un siman intensivo cu hopi entrenamento extra pa e karateka Kevin Lugo, kende tabata hopi motiva y consciente di e nivel halto di karate cu el a bay confronta na Santiago, Chile. Durante e campeonato Aruba a bringa contra Uruguay. E bataya tabata duro y aunke Kevin Lugo a lucha durante henter e pelea, e no a logra gana e pelea aki. Sin embargo, e karateka Kevin Lugo a yega Aruba bek contento y satisfecho. E experiencia di e campeonato pan
americano aki ta habri caminda pa e sigui padilanti. E lo no para keto! A analisa bon kico
mester mehora pa asina bay mas fuerte na e siguiente campeonato.
Pa loke ta e team Aruba, directiva di Aruba Karate Bond y su miembronan, ta extende un felicitacion tanto pa sensei Alberto Gonzalez Lujan (assistantcoach di AKB) y sensei Jose Vivas (
arbitro) kendenan a sigui diferente curso aya y a pasa e examen di esakinan exitosamente.
Ambos a keda masha satisfecho cu tur loke nan a siña y presencia durante e campeonato importante aki. Un danki special ta bay pa sensei Anthony Geerman (headcoach di AKB) cu a yuda train Kevin Lugo prome cu su salida. Aruba Karate Bond ta gradici tambe Comite Olimpico Aruba (COA), Aruba Sport Unie (ASU), Sport Subsidiecommissie Aruba (SSA) y Lotto pa Deporte cu ta sosten e karate na Aruba.