Aruba lo por presencia pa prome biaha den historia e feria di arte ‘Aruba Art Fair’ (AAF). Ta trata aki di un magno evento cu ta uni tur disciplina di Arte den un solo feria durante 3 dia, 16, 17 y 18 di September na Aruba y den San Nicolas. Diaranson atardi team di Aruba Art Fair, Minister di Cultura Otmar Oduber, representante di Oficina di Turismo, Patrick Melchiors, gerencia di AAA y prensa, a yama bon bini na un di e prome artistanan international cu a bin special pa yuda Aruba Art Fair transforma San Nicolas y Aruba den un paraiso artistico. Bordallo naci na Lisbon, Portugal, ta un ‘street artist’ cu por medio di su lema di ‘one man’s trash is another man’s treasure’ a sa di no solamente crea arte fenomenal cu material cu hopi ta considera desperdicio, pero mas aun e ta crea concientisacion riba e tema di sostenibilidad, reciclahe, ecologia riba nivel social pa loke ta trata e polucion di nos planeta. Ta interesante pa mira y contempla con por medio di street art Bordallo II lo mustra Aruba kico tur por wordo haci riba nivel creativo cu materialnan cu a wordo benta afo. Di e forma aki Borallo II lo apodera di e edificio di ATCO, y lo transforma e muraya entre ATCO y Biblioteca den un piesa di arte. Bordallo II a conta cu un bonbini special for di AAF su hotel partner Divi Resorts, unda nan lo ta hospedando. Esunnan cu lo kier presencia e magno evento aki por haya mas informacion riba con pa participa, registra of con pa bishita durante e 3 dianan den september riba e website www.arubaartfair.com of facebook page.