Diaranson 9 di Mei 2018 a tuma luga riba tereno di Bubali e ultimo wega di Division Junioren cu a keda pendiente, entre Bubali contra di Brazil Jrs,
Wega a wordo dirigi pa arbitro principal Ronald Staring asisti pa Desiree Christiaans y Alexander Simmons.
Den e prome parti di wega ambos ekipo a purba yega na e gol pa bay ariba pero no por a logra. E ekipo di cas Bubali a crea un poco mas oportunidad cu nan contricante.
Den e di dos parti di wega Bubali a pone basta preshon y tabata na di 52′ di wega e hoben Dylan Tromp #47 ta logra habri e marcador cu un tremendo tiro cu e keeper no por a haci nada pa bay ariba 1-0 riba e marcador.
Brazil Jrs ta crea espacio pa forma algun peliger riba e gol di Bubali pero no por a logra score.
Arbitro principal mester a saca diferente kaarchi geel y den e ultimo minuut nan ta saca un cora pa e defensa di Brazil Jrs.
Bubali ta logra bay cas cu un victoria di 1-0 riba Brazil Jrs.
Mirando e tabla di posicion despues di e wega aki , equipo nan cu a logra clasifica pa e finalnan ta Estrella- Bubali- Brazil Jrs y Nacional Division Junioren.
Exito na tur e ekipo nan.