Diahuebs ultimo Brazil Taekwondo Stichting a reuni pa asina cuminsa reparti tur e tareanan pa e camp training di Carlos Hernandez cu lo bay ta na Aruba 26 di Maart te cu dia 3 di April y ta bay hospeda na Paradise Beach Villas.
Danica Delamore a bisa kiko tur ta spera di tur mayor, tambe a bisa cu dia 8 di April Brazil Taekwondo Stichting ta organisa e Ultimate Taekwondo Cup y un team grandi di atletanan di Brazil Taekwondo Stichting ta bay midi forsa. E aña aki lo biaha pa Surinam for di diaranson y no diabierna anochi pa asina e atletanan por descansa pa ta bon prepara pa e Open di Surinam. Manera cu bolbe for di Surinam ta bay tin e warming up pa e team di Korea cu mester ta den nan top shape pa Korea Open cu ta un G2 ranking.
A dicidi di bay bek cu car wash y BBQ, mirando cu e rifa ta duna su fruto, per hopi ta pidi pa e BBQ cu ta asina dushi. Pueblo a gusta e mannan cu ta haci e BBQ di Brazil Taekwondo Stichting. A plania e siguiente BBQ y car wash pa dia 7 di Mei, mirando cu dia 2 di April nos tin e rifa di un BBQ Grill. Josefa Willems a duna cuenta di e parti financiero y cuanto carchi a wordo bendi di e rifa di e television. Alberto Klabér a splica bon cla cu e ta bay forma un team nobo pa e proximo TK5, no ta sigur si lo bay Corsou ainda, mirando cu no tin un aerolinea cu por garantisa nos yega bon y bolbe bek. Lo bay evalua e resultadonan di Ultimate Taekwondo Cup pa asina cuminsa manda invitacion pa tur e scolnan di Taekwondo na Aruba cu tin atleta cu kier forma e team di TK5.
Nos semper ta cuminsa cu un preparacion hopi trempan pa asina por duna tur atleta e oportunidad pa drenta den e team di TK5. E no ta un free for all. Nos tin 5 aña consecutivo ganando e Copa na Surinam y nos kier sigui gana esaki pa pais Aruba. We Train Hard to fight Smart.
Asina por a nota cu ainda no por a keda cla cu tur e puntonan di e reunion, mirando cu ta asina hopi cos y hende ta envolvi den e taakverdeling. Training a cuminsa subi e seroe caba y por ultimo a laga e parti di uniform pa e proximo reunion.