Suramerica a keda sin niun representante den e fase final di e torneo. E proximo campeon di mundo lo ta un Europeo un biaha mas.
E seleccion di Belgica a clasifica pa semifinal di mundia Rusia 2018, despues di, sorpresivamente, a gana Brazil den e partido di kwartfinal diabierna na Kazan.
Na di 13’ minuut, Fernandinho ta hinca un autogol pa e ‘diabel coranan’, habriendo e marcado. Despues De Bruyne a marca e di dos, y asina tambe Belgica ta haci e marcado 2-0, den un contragolpi comanda pa Lukaku.
Renato Augusto, cu un rato prome a reemplaza Paulinho, na di 76’ ta desconta e score pa Brazil. Despues di e gol aki, e ‘canarinha’ a lansa tur su artilleria contra di e area Belga, pero el a dal contra di un defensa completamente sera. Ademas, e Suramericanonan tabata faya demasiado, perdiendo tur e oportunidnan di sorprende e rivalnan.
Den e di dos parti y cu e score na nan fabor, e ‘diabel cora’ nan a cera patras, pero ora cu nan tabata sali cu e contragolpi nan tabata causa dolornan di cabes fuerte den e defensa Brazilero.
Den un di e dos semifinalnan, Belgica lo enfrenta Francia na St. Petersburg dia 10 di juli proximo.
Asina tameb Suramerica a keda sin representacion den e fase final di e torneo y e siguiente campeon di mundo lo ta un ekipo Europeo atrobe.