SAO PAULO, Brasil – Un bruid bisti di blanco, hunto cu otro tres persona, a muri ora cu e helicopter cu nan tabata biaha aden, a accidenta diadomingo, dia 4 di December, na Sao Lourenco da Serra, estado di Sao Paulo, Brasil. E bruid, Rosemere do Nascimento Silva, su ruman homber, e piloot y e fotografo, kende ademas tabata na estado di shete luna, tabata bulando pa e ceremonia ora cu e accidente a sosode, TV Record a reporta, afilia na CNN. No tabata tin sobreviviente. “Tur bruid tin un soño y di dje tabata pa yega den helicopter na su casamento. Tabata un sorpresa pa tur e invitadonan, incluso pa e bruidegom,” e organisado di e evento Eduardo Batista a declara na O Globo.
E helicopter modelo Robinson 44 a cay poco kilometer prome cu e luga unda cu e bruidegom y invitadonan ta sperando e bruid tabata.
“Mi a pidi ayudo na e pastoor kende lo a realisa e ceremonia pa comunica e noticia na e bruidegom y despues mi a combersa cu e invitadonan,” Batista a bisa O Globo.
“E bruidegom tabata ansioso wardando y mi a pensa, por ta den un ora e ta yega. Despues nos a scucha e noticia loke a pasa,” Rita Damasceno, un di e damanan di honor a bisa TV Record.
E Agencia Nacional di Aviacion Civil di Brasil (ANAC) a declara na CNN cu, segun e registronan, e aeronave di matricula PR-TUN tabata bula cu tur e certificadonan di inspeccion valido. Ademas tabata cumpli cu e maximo di pasahero permiti pa bula.
E investigacion di e accidente ta na encargo di Centro Nacional di Prevencion y Investigacion di Accidentenan Aeronautico (CENIPA).
Fuente: CNN en Español