Boy Thode a contrae matrimonio na Las Vegas

0

WILLEMSTAD, Curacao- Diabierna tabata na Aruba, e cantante masha stima di Corsou, Sr. Boy Thode. E tabata na Aruba como invitado special na un Bingo. Durante un entrevista cun’e na un radio emisora local, el a lansa e bom mes. Sr. Boy Thode a casa siman pasa diabierna na Las Vegas, cu su pareha di hopi aña, Giggiola Jansen.
Las Vegas ta e luga caminda cu tur artista famoso ta scoge pa nan casa y esaki tambe e maximo cantante di Corsou a haci. Nan a bay cu un vakantie y eynan Boy a propone Giggiola matrimonio. Despues di tres dia, tur cos a keda regla y nan por a casa.
E pareha Thode- Jansen tin basta aña cu otro y nan a scoge dia 19 di October ultimo, pa uni cu otro legalmente, den un matrimonio na Las Vegas.
Boy Thode ta un cantante masha admira y respeta tanto na Aruba, Corsou, Bonaire y te na Hulanda, caminda el a cosecha éxito. Boy ta un cantante cu sa haci presentacionnan durante casamento of durante un cumpleaños. Pero na su mesun casamento mes, no tabata tin niun cantante pa a canta pa e pareha.
Nos ta sigur cu Boy su coleganan musico lo sa di prepara algo pe y di e manera aki, desea Boy y Giggiola tur clase di éxito den e boto matrimonial.
Masnoticia ta desea Boy y Giggiola Thode palabranan di pabien y cu nos Bon Dios, bendiciona nan matrimonio ricamente.