Biba den un pais democratico unda tin respet pa derechonan fundamental, manera libertad di expresion, parce di ta birando un luho aki na Aruba. Mi a tuma nota con e minister di Infrastructura Otmar Oduber a cay atrobe den un polemica pisa cu, den e caso aki, e directiva di Parke Arikok. E bida politico di Sr. Oduber ta yena cu pleito y polemica. Nos por corda e caso di Fondo di Desaroyo San Nicolas na unda cu lagrima na wowo el a declara su mes inocente pero vooral VICTIMA atrobe.
Su actuacion den parlamento y despues como mandatario a wordo categorisa cu atakenan personal contra tur hende, manera papa y ruman di su contricantenan, cu tabata tribi di cuestiona su maneho. “It was always his way or the highway”. A tuma su retiro for di e di dos gabinete Mike Eman, supuestamente pasobra e no tabata di acuerdo cu casonan dudoso di su coleganan minister y su pober persona tabata inocente y vooral e VICTIMA atrobe.
Awor aki e ta forma parti di e gobierno di coalicion y den apenas 7 luna nos por a tuma nota di un pensamento dictatorial na unda e ta expresa di boca pafor di ta acepta participacion (inspraak), pero den realidad ta ataca esnan cu ta tribi di contradeci su maneho y hunga VICTIMA atrobe.
Si compara su actuacion den e dos casonan mas recien, esta esun di Serlimar y di Parke Arikok, por ripara di inmediato e forma di proceder di Otmar Oduber. Ela exigi loyalidad incondicional pa ehecucion di su plannan macabro den ambos caso y nos a constata cu e dirigentenan di Serlimar si tabata dispuesto pa “dans naar de pijpen” di “his masters voice”.
E directiva di Parke Arikok sinembargo no tabata dispuesto pa cumpli cu esaki. Consecuencia ta un pleito formal cu e directiva di Parke Arikok y di otro banda ela “take care” di tur esnan cu si a “dans naar zijn pijpen” na Serlimar. Salarionan barbaro (10.680,= florin pa luna cada un di e dos directornan di un compania “noodlijdend”) a wordo regla pa esnan cu ta colaborando cun’e “al pie de la letra”. Pa colmo tur esaki cu consentimento di e gremio comercial y sindical cu tin representacion den e Hunta di Supervision. “Geen haan die ernaar kraait”!
Pueblo di Aruba ta sinti na carni propio e consecuencia di e dictadura cu ta sutando Venezuela, pero nos no kier habri wowo pa un situacion semehante aki na Aruba cu por conduci na mesun situacion. Aki nos kier a referi na e forma dictatorial cu Otmar Oduber ta actuando na Aruba. Si bo ta cumi mi lo percura pa nada no faltabo (ela pamper esnan cu ta 100% di acuerdo cune), pero Dios spaar bo si bo tin bo propio opinion y bo tribi di contradici’e. Un dicho hulandes ta spierta nos debidamente: “hij duldt wel inspraak, maar absoluut geen tegenspraak”. Esey ta comienso di e fin di nos democracia, pero tambe di nos finansas publico, pasobra e tin nos gobierno y tambe e parlamento completamente secuestra y bou di su dominio. Otmar Oduber ta e unico cu ta 100% #sinmiedo y ta keda derocha placa di pueblo sin misericordia.
Nos tambe ta coriendo riesgo pa wordo hiba corte paso nos ta skirbi cosnan cu ta bai contra e bienestar di Aruba?