ATENAS, Grecia- Bomberonan diamars tabata lucha contra di tres candela forestal grandi, pa di tres dia consecutivo. E bientonan duro ta dificulta e tarea, segun autoridadnan.
Pa aworaki, niun zona habita tabata wordo menasa pa candela den e tres zonanan afecta, segun un vocero di bombero a indica na AFP.
E candelanan ta localsia na e zona costero na casi 50 km di Atenas, den cercania di e ciudad di Amaliada cu ta conta cu 32 mil habitante.
E bientonan cu ta supla entre 40 km/h y 50 km/h den e zonanan afecta ta dificulta e tarea di e bomberonan cu ta luchando contra e multiple centronan di candela declara for di siman pasa.
Den e region di Atenas autoridadnan a recuri na e ehercito pa lucha contra di e candela cual a cuminsa na e localidad di Kalamos, unda cu 240 bombero a wordo desplega y dialuna e vlamnan a destrui cinco vivienda.
Tres avion y cuatro helicopter a wordo mobilisa pa combati e candela cu ta oscurece e shelo di Atenas. Varios habitante di e zona di candela a wordo evacua debi na e atmosfera afixiante.
Bomberonan tambe ta lucha incansablemente contra di e candela ariba e isla turistico di Zante, unda cu dos candela grandi a avansa den e area zuidoost y noordoost.
Minister di Husticia, presente na Zante a declara cu e candelanan ta di origen criminal, cual opinion ta wordo comparti pa autoridadnan local cu a señala 20 foco di candela durante fin di siman.
Cerca di Amaliada, un localidad mester a wordo evacua preventivamente den oranan di anochi di dialuna, pero finalmente e candelanan no a yega na e pueblo, segun bomberonan.
E incendio mas catastrofico cu Grecia a yega di conoce a keda registra na 2007, na Peloponese y e isla Evia, den cual 77 persona a perde nan bida y a kima 250 mil hectarea di mondi.
Fuente: https://www.afp.com/es/noticias