SANA’A, Yemen- E coalicion lidera pa Arabia Saudita a uza bombnan di fabricacion Mericano den su atake aereo di diahuebs ultimo cu a impacta contra un bus escolar. E bus tabata bayendo pa campamento di verano. Cuarenta mucha a perde nan bida den e total di 51 morto y 79 heridonan, di cual 56 menor.
E bomb cu a wordo uza den e masacre tabata un MK 82 guia pa un laser y di 227 kilo di peso. Danki na e trabao di expertonan den municion cu a analisa e codigonan numerica den un di e piesanan di proyectil recupera, por a determina cu esaki a wordo fabrica pa un di e principal contratistanan di defensa di Washington, Lockheed Martin.
Un prohibicion cu no a dura ni un aña
E MK 82 ta hopi similar na e bomb cu a mata 155 persona y laga mas di shen persona herida den un entierro na Yemen na 2016. E tragedia aki a ahci cu e ex mandatario Mericano Barack Obama a prohibi e benta di e tipo di tecnologia militar na Arabia Saudita debi na e preocupacionnan relaciona cu e derechonan humano”.
E arma aki ta forma parti di e armamento bendi na Arabia Saudita despues di e acuerdo firma di casi 110 biyon dollar cu e Departamento di Estado di Merca aña pasa. E luna aki, Washington a caba cu e prohibicion impone door di Obama pa bolbe autorisa e benta na Riad di municionnan di e variante Paveway (manera MK 82).
Reaccionnan contra di e atake riba e bus escolar:
Despues di e ocurrido, e gobierno Mericano a rechasa tur e responsabilidad alegando cu no ta tuma decisionnan riba e obhetivonan militar di e coalicion lidera pa Arabia Saudita
E vocero di coalicion, e coronel Saudita Turki Al Malki, a remarca cu ta “miho pa e coalicion no haci mas comentario mientras e investigacion ta den marcha”y cu “tur perdida civil ta un tragedia”.
Arabia Saudita a nenga cu a atakenan dirigi na civilnan y a bisa cu e incidente tabata un “operacion militar legitimo” y un respuesta den represalia na e lansamento di un misil balistico di parti di e Huties e dia prome
Nacionnan Uni a pidi un investigacion independiente riba e atake mortal aki.
Na comienso di e siman aki, decenas di mucha a sali ariba cayanan di Sana’a, e capital di Yemen pa protesta contra di e campaña di bombardeo di e coalicion internacional lidera pa Arabia Saudita, cu a cuasa varios victima entre e poblacion civil di e pais.