LONDON, Reino Uni- E dia cu hopi tabata warda ariba dje, a yega. Aruba y mundo henter tabata pendiente di e casamento di e yiu homber mas chikito di Prins Charles y Prinses Diana d.f.m. For di trempan, tur hende tabata pendiente pa e matrimonio di momento.
E ceremonia a cuminsa pa 12’or di merdia, ora local.
Tabata trata aki di e enlace matrimonial di prins Henry di Inglatera, miho conoci como Harry cu e actriz Mericano, Rachel Meghan Markle, miho conoci como Meghan. Esaki tabata e evento aristocratico mas importante di aña.
Prins Harry y e actriz Mericano Meghan Markel a bisa otro si den un ceremonia entrañabel y solea den e localidad di Windsor. E ceremonia a genera expectativanan grandi rond mundo.
E entrada di Markle, di 36 aña, den e Kapel di St. George den Windsor Castle tabata espectacular.
Prome cu e ceremonia, Reina Isabel II, di Inglatera a otorga Harry y Meghan e titulo di Duke y Dukesa di Sussex. E ceremonia a wordo oficialisa door di e Arzobispo di Canterburry.
E union di e actual dukenan di Sussex, a bira oficial ora cu e Arzobispo encarga cu e ceremonia a bisa e palabranan aki: “Den presencia di Dios y dilanti e congregacion aki, Henry y Meghan a duna nan consentimento y a haci nan promesanan di matrimonio uno na otro. Nan a declara nan matrimonio door di e union di nan mannan y pa e entrega y recepcion di e renchinan. Por lo tanto mi ta proclama nan como casa.”
Manera ta tradicion, e himno di Reino Uni, ‘God Save The Queen’ a resona.
Entre e celebridadnan invita na e casamento tabata t’ey, Amal y George Clooney, David y Victoria Beckham, Oprah Winfrey, Serena Williams y su casa y mas, mescos cu miembronan di e famia real y di e aristocracia Britanico.
Di parti di e famia di Meghan, solamente e mama tabata t’ey presente na e ceremonia.
Den su ruta pa altar, Meghan tabata compaña di su bruidsjongen y bruidsmeisjesnan, pa despues ta ricibi pa e tata di e bruidegom, prins Charles y su propio prins, Henry.
Windsor ta e kasteel mas habita mas bieu y mas grandi di mundo. Ta e residencia oficial di reina Elisabeth II, kende ta pasa e mayor parti di su fin di simannan eynan.
E kapel tin un capacidad di rond di 800 persona.
Despues di e ceremonia, e pareha real a bandona e kasteel di Windsor den un “koets” pa un procesion di mas of menos 3 kilometer, biahando riba High Street, atrabes di e ciudad di Windsor, prome cu a regresa e kasteel via e Long Walk.
Despues di e procesion, e pareha y e invitadonan a asisti un recepcion ofreci pa reina Elisabeth II den St. George’s Hall, den e camponan di e kasteel, finalisando e eventonan publico di dia.
Presente na e ceremonia tabata omo di Harry, Charles, e di 9 Conde Spencer tabata compaña pa su casa, Condesa Karen Spencer.
Mester bisa cu Harry y e Mericano Meghan Markle diasabra a hechisa e cayanan di e localidad Ingles di Windsor, cu a luci un gran cantidad di banderanan Britanico pa celebra un di e matrimonionan mas importante di aña.
Pa e ocasion aki, e pueblo, di 30 mil habitante, no a perde e oportunidad di exhibi su miho banda y a colorea e paisahe cu miles di personanan cu a sigui di cerca henter e espectaculo cu a rondona e ceremonia.