Blackberry ta demanda Facebook pa violacion di su patente

0

TECNOLOGIA

E compania tecnologico Canades, Blackberry diamars a entrega un demanda den Corte Federal di California, Merca contra Facebook y su subsidiarionan Instagram y Whatsapp. Blackberrty ta acusa esakinan di uza su tecnologia di mensahe movil.
Den un comunicado, e compania a bisa di a presenta un “demanda” contra di Facebook pa viola su propiedad intelectual y a sigura cu e ta buscando un solucion legal y apropia, pa e miho di su accionistanan.
BlackBerry, cu a comercialisa su mesun aplicacion di mensaheria movil, Blackberry messenger (BBM) na 2005, ta pretende di haya un orden hudicial pa forsa e compania funda door di Mark Zuckerberg, pa cera e aplicacionnan y e portalnan, entre nan Facebook, Facebook Messenger, Whatsapp y Instagram. Tambe e ta pidi un daño y perhuicio pa un cantidad no specifica, segun e revista Variety.
Segun e demanda, Blackberry ta haya cu e compania tecnologico y su subsidiarionan a crea aplicacionnan di manda mensahe cu ta uza shete di su patentenan den areanan di siguridad, interface of e eficiencia di e bateria, aunke el a mustra habri pa un dialogo of pa colabora.
E compania, lanta na 1984 y cu pa mas di un decada caba tabata domina e mercado di telefonnan mobil, awo ta concentra den servicionan di software y cybersecurity, despues di a cede e fabricacion di telefon cu su marca na e compania Chines, TLC, bou division di Blackberry Mobile.
Den su nota, e compania Canades a afirma di cu e tin hopi respet pa Facebook y pa e balor cu el a pone na e capacidad di manda mensahe, algun di cual a wordo crea pa Blackberry.
“Como lider di cybersecurity y e software integra, e perspectiva di Blackberry ta cu Facebook, Instagram y Whatsapp lo por ta socionan grandi den nos caminda pa un futuro conecta y sigur, y nos lo sigui mantene e porta habri pa nan”, el a enfatiza.

Fuente: www.diariotecnologia.es

Comments

comments