“Actualmente nos ta papia di tres museo. Museo Historico conoci tambe como Fort Zoutman, Museo di Industria cu ta situa den e watertoren na San Nicolas y Community Museum cu actualmente ta localisa banda di CMB San Nicolas y pronto lo muda pa Nicolas Store. Den futuro tin dos museo mas cu lo forma e cinco museonan di Fundacion Museo Arubano pa e proximo añanan”, asina Director di FMA, Anky Vrolijk a cuminsa bisando.
E bishita di Björn Stenvers ta pa asisti FMA cu ta manehando tres museonan actualmente y pronto lo ta manehando un total di 5 diferente museo. “E ta manehando 48 museo na Amsterdam y ta traha pa 56 director. Tin museonan mas grandi cu otro. E museonan mas grandi tin mas cu un director pasobra cada un tin diferente funcion. Sea bo tin e funcion di director comercial of e persona cu tin mas conocemento riba contenido. Bo ta nota cu e ta un mundo asina grandi cu tin biaha bo tin diferente hende pa ocupa e funcionnan aki”.
Fuera di entrenamento di e personal di FMA, a organisa un encuentro cu diferente partnernan cu a traha hunto pa dos dia. “Nos tabatin e workshop pa e team completo diabierna ultimo. Bo ta mira cu hopi informacion concreto ta bin dilanti y cu nos den e mundo aki ta compronde tambe”, asina Anky Vrolijk a sigui bisa. “Björn tin un experiencia increiblemente grandi no solamente na Hulanda pero na diferente parti di mundo. E ta mira asina hopi diferente museo y maneranan di traha strategia. Tur esaki e ta treciendo den e tayer aki tanto pa e team como tambe e partnernan cu ta envolvi cu e museonan”, di acuerdo cu Anky Vrolijk.
E experto Hulandes a splica cu FMA tin hopi pa ofrece caba y cu awor tin cu link e cu turismo. El a studia e diferente plannan cu FMA tin. “Ta e intencion cu na final Sr. Stenvers lo entrega un verslag cu un bista di kico el a mira como tambe puntonan di mehoracion. FMA tin plannan grandi cu kier sigui ehecuta pero tambe ideanan nobo. Mi ta kere cu e ta hopi importante pa realisa cu nos no mester inventa e wiel. Treciendo experticio di personanan cu asina hopi experiencia riba nivel mundial, no solamente riba contenido di e museonan pero tambe e mercadeo rond di e museonan cu ta asina importante, e promocion ta necesario”, Anky Vrolijk a enfatisa.
E director a sigui splica cu tambe a bin cu ideanan creativo con pa yega na fondonan pa e fundacion por sigui inverti. “No solamente conscientisa nos local pero tambe nos turistanan kico tur nos tin pa ofrece pero tambe crea formulanan pa yega na e fondonan aki. Esey ta algo hopi importante. E ta e direccion cu nos kier bay. Awor aki nos ta haya hopi fondo di diferente partnernan y nos ta hopi contento. Nos ta spera cu nos lo por sigui conta riba nan pa hopi aña mas. Pero e intencion ta cu sigur den 10 aña e museonan aki lo mester ta para riba nan mes, sostenibel. Tambe nos kier crea fondonan pa nos por bolbe hinca den e contenido di e museonan y den educacion p’afo di e museonan”, Anky Vrolijk a accentua.
A funda Fundacion Museo Arubano na aña 1992, pero na 2015 a haci cambionan structural pa pone 5 museo hunto bao di un organisacion. Ta trata aki di e Museo Historico (Fort Zoutman, Oranjestad), Museo Arkeologico (Ecury Complex, Oranjestad), Museo di Comunidad (Nicolas Store, San Nicolas), Museo Industrial (Watertoren, San Nicolas) y Museo di Carnaval (San Nicolas). Museo di Comunidad y Museo Industrial ta programa pa habri na aña 2016 y Museo di Carnaval lo habri na 2017.
E idea general ta pa trece museonan mas cerca di comunidad y ta trahando pa reenforsa tur museo pa hisa e calidad y logra pa nan yega na e nivel di Museo Arkeologico, cual ta reconoci como un di e miho museonan di Caribe. E siguiente museo pa habri, den e prome mita di aña 2016, ta Museo Industrial. Ta trahando caba riba plannan pa haci e museonan mas atractivo pa comunidad y subraya e importancia di historia y cultura.
Fundacion Museo Arubano tin su oficina principal situa na Zoutmanstraat # 1. E fundacion ta conta cu sosten financiero di varios instancia, entre otro di Aruba Ports Authority cu ta cobra cada pasahero riba crucero un “fee” special cu ta bay entre otro pa promove nos museonan.