CIUDAD DI MEXICO, Mexico- Jared Kushner, yerno y consehero di e president di Merca, Donald Trump, diaranson lo realisa un bishita di trabao pa Ciudad di Mexico, den calidad di representante politico di e mandatario Mericano, según un comunicado di e Departamento di Relacionnan Exterior.
Kushner, cu lo yega e pais Azteca compaña pa miembronan di e Departamento di Estado y di e Conseho di Siguridad Nacional di Merca, lo tin un audiencia cu e presidente di Mexico, Enrique Peña Nieto, como tambe un reunion di trabao cu e canciyer Luis Videgray.
Según e Departamento di Relacionnan Exterior: “durante e reunionnan lo revista e estado di varios tema di e agenda bilateral”, sin specifica niun di nan.
E bishita di Kushner na Mexico ta bin a pesar di cu e corant The Washington Post a revela recientemente cu e funcionarionan di al menos cuater pais, entre nan, Mexico. Nan a discuti, di forma priva, con pa manipula e yerno di Trump, probechando di su “dificultadnan financiero” y “su falta di experiencia den politica exterior”.
Ta di destaca cu e reunion di trabao entre Kushner y Videgaray tambe ta tumando luga mei mei di e negociacionnan tenso di e Tratado di Libre Comercio di America del Norte (TLCAN), cu a wordo proponi pa Merca debi na e analisis minucioso di e reglanan di origen di e sector automotriz.
Otro di e factornan cu ta suma na e bishita inespera, ta e anuncio recien di presidente Trump, di aumenta e tarifa di importacion pa 25% riba staal y 10% ariba importacion di aluminium. Gobierno di Mexico a responde anunciando cu e lo impone impuesto di importacion ariba “bienesnan politicamente sensibel”.