Dialuna 10 di October y diahuebs 12 di October Archivo Nacional Aruba(ANA)a haya bishita hopi agradabel di un grupo di 60+(plusser) cu yama “Fundacion Movimento pa Bida”. Esaki den cuadro di un programa cu e fundacion tin “hunto nos ta vence envehecimento” , e grupo aki ta di bario di Tanki Leendert y ta bou guia di Juffrouw Indra kende ta un boluntario. Afdeling dienstverlening di ANA cu sumo placer a ricibi nan y e resultado di e bishita tabata hopi interesante y agradabel. Dialuna 10 October nos a mustra e grupo aki diferente portret di casnan tipico cu hopi di nan lamentablemente no tey mas y portretnan cu nos di ANA no tin informacion unda nan ta situa ni tampoco di kende nan ta of tabata, nan contribucion den esaki tabata sumamente rico na informacion. Ora nan tabata wak esakinan riba big screen, nos tabata tende……. e cas ey ta di difunto tal, e cas ey ta na tal caminda y asina ey e mainta a pasa asina agradabel cu hopi informacion cu nos a logra compila pa nos archivo. Nos a ofrece na e grupo pa wak algun documentario di Aruba di antaño y diahuebs dia 12 di October e grupo a bin bek y asina nos a pasa 2 documentario cu nos mester bisa hopi interesante y e grupo a keda hopi contento. Di parti ANA y specialmente nos di dienstverlening kier a gradici “Fundacion Movimento pa Bida” pa bin bishita nos y na mes momento nos kier a extende un invitacion na tur e gruponan di 60+(plussers) den nos comunidad cu tin interes pa bishita nos departamento na Archivo nacional, pa yama nos libremente na tel: 583-4880 pa un cita.