Arte tambe tin su luga den e concepto di Facilidadnan Multifuncional cu Gabinete Mike Eman II ta habriendo den diferente districto. Actualmente un y tur por admira exposicion di artista Arubiano Danilo Geerman na MFA Noord. “Trans Organica” ta e nomber di e serie di pinturanan traha cu acuarela, inkt Chines y stift basa riba e transformacion organico di un especie pa otro. Mas di 30 obra, incluyendo oleo riba canvas y tambe ceramica, ta visibel y obtenibel den e sala di reunion y otro espacionan di e edificio multifuncional ubica na e crusada principal di Noord, te cu cuminsamento di Januari 2017.
“Nos ta habri di 7’or y mey di mainta te 4’or y mey di atardi. No ta necesario pa bin haci di un servicio, pero semper MFA ta habri pa tur hende; dus ki ora cu ta por yega pa wak e obranan,” asina gerente general di MFA Noord, Richard Tromp a splica haciendo invitacion na e comunidad di Noord y Aruba en general. Ademas di exhibi e obranan di nos artistanan local, e sala ta keda sirbi su otro funcionnan pareu manera pa reunion, tayer, etc.
E artista mes ta wak den un luz masha positivo e hecho cu e y otronan por conta cu un espacio mas caminda por demostra nan talento; e ta un apoyo pa hopi di e coleganan artista cu kier mira nan obranan expone na un publico mas amplio cu esun cu regularmente ta bishita e galerianan di arte. Adicionalmente, Geerman a comparti cu e comunicacion cu directiva di MFA Noord a bay di un manera hopi bon y facil.
“Tambe muchanan di scol cu tin cerca akibanda por bin MFA Noord pa wak un rato despues di scol. Bo no mester di full un dia, un mey ora of 45 min mes ta bon. Mayornan bin cu muchanan wak arte!” asina e artista a remarca. Otro artistanan interesa pa tambe tin nan obranan expone na MFA Noord, of pronto MFA di Paradera, ora cu esaki habri oficialmente, por tuma contacto via telefon, Facebook of pasa personalmente pa papia cu gerencia.