Bishita di delegacion Hulandes bou tension door di boycott comercial di Maduro

0

DEN HAAG, Hulanda- E boycott cu Venezuela a anuncia contra di e islanan ABC lo ta punto di discusion durante e bishita di politiconan Hulandes na Aruba y Bonaire. E delegacion Hulanda lo sali diadomingo pa Bonaire. Pa despues sigui pa Aruba.

E bishita ta bin net despues di e anuncio di Maduro pa cera fronteranan cu e islanan Caribense. E kier haci esaki pa evita cu e poco cuminda cu su pais tin, mas tanto berdura y fruta, wordo hiba pa e islanan Aruba, Bonaire y Corsou, via barconan di fruta.

“Ta e mafiosonan cu tin un guerra contra nos”, segun Maduro relaciona cu e comercio cu, den su bista, ta manda productonan basico ilegalmente pa e islanan aki, pero tambe diamante y koper.
E presidente Venezolano ta pone un parti di e solucion den scochi di e gobierno di e islanan. “Mi ta desea pa den e proximo 72 horanan autoridadnan di e islanan aki tuma e medidanan necesario cu nos a exigi”. Cual ta e medidanan aki, ta un misterio. Aruba y Corsou ta islanan autonomo den Reino, pero Bonaire ta un gemeente di Hulanda.

“E ta un punto di atencion”, segun e hefe di delegacion, Alexander Pechtold tocante e boycot comercial. “P’esey ta di sumamente importante pa nos trece nos puntonan dilanti”. E posicion di Hulanda ta un punto di preocupacion pa Pechthold. “Venezuela ta un bisiña grandi di nos, caminda cu actualmente tin reina un insiguridad grandi. Si esaki a sosode na Europa, lo tabata tin consecuencianan hopi mas grave”.

Delegacion
E delegacion di e politico lo consisti di miembronan di tanto Eerste – como Tweede Kamer. Ademas di Pechthold, Machiel de Groot (PVV), Ronald van Raak (SP) y Attje Kuiken (PvdA) lo forma parti di e delegacion.

Dialuna y diamars lo tin un bishita di trabao na Bonaire. For di 9 te cu 11 di Januari lo tuma luga e Interparlementair Koninkrijksoverleg (IPKO) na Aruba.

Durante e reunionna aki di IPKO, e delegacionnan di Staten- Generaal y Staten di Aruba, Corsou y St. Maarten, lo toca temanan cu ta di interes di tur e paisnan den Reino. E tema central di IPKO lo ta sostenibilidad y clima. Dimes, e tema di e destruccion cu horcan Irma a laga atras tambe lo ta punto di interes.

Fuente: https://www.telegraaf.nl

Comments

comments