Bishita cerca Vice-presidente di Raad van State

0

Minister Plenipotenciario di Aruba Guillfred Besaril a haci un bishita oficial na Vice-presidente di Raad van State mr. Piet Hein Donner. Tambe presente na e combersacion tabata e secretario di Raad van State mr. dr. Rob Visser.

Durante e bishita a papia riba diferente topiconan, entre nan e institucion di un comision di Disputa (Geschillenregeling) pa Reino Hulandes. Sr. Donner a accentua e importancia di dicho comision pa e paisnan den Reino. E Vice-presidente a puntra sr. Besaril alabes con e tramitenan na Aruba ta bayendo pa loke ta e institucion di e Camara di Intigridad (Integriteitskamer) y Ombudsman.

Otro punto cu a papia riba dje ta e relacion entre Aruba y Caft. E mandatario a informa sr. Donner cu tur cos ta canando segun e palabracionnan cu Caft y Ministerio di Reino. E presupuesto di 2018 lo keda trata e luna aki den Staten di Aruba, pero mas importante, segun sr. Besaril, ta cu tambe lo trata un “meerjarenbegroting”, cu ta den linea cu e palabracionnan cu Aruba tin cu Caft y Ministerio di Reino.

Tambe Sr. Donner a bisa di ta desea pa mira un rol mas pro activo di parti di Gobierno di Aruba pa loke ta e fortificacion y mehora di e aparato publico a traves di un academia pa formacion Admistrativo Gubernamental. E mandatario a informa Sr. Donner cu ademas di dicho formacion Aruba conoce un scarsedad cronico na huristanan legislativo (Wetgevingsjuristen) y cu e academia lo por sirbi como plataforma pa atende cu dicho necesidad.

E mandatario a gradici Sr. Donner pa e recepcion ameno y e combersacion habri riba topiconan di interes mutuo entre Aruba y Raad van State y cu sigur lo informa comunidad y gobierno di Aruba di detayenan di e encuentro.

Potret ta cortesia di Cas di Aruba

Comments

comments