Diamars e biento tabata basta fuerte y esaki a yega te cu 37 nudo y tabata un registro oficial na Meteo di Aruba, na Hadicurari e maximo tabata 34 nudo. E average di biento te cu diamars 4′or atardi tabata 20 nudo cu rafaga di 37 nudo. Esaki ta basta mas cu e average di 15 nudo cu maximo di 31 nudo den Februari. E biento duro ta wordo causa door di un area di precion atmosferico abou banda di Panama y Colombia combina cu un area di precion halto riba Atlantico. Ta anticipa cu un sistema frontal Oost di Merca lo yega mengua e froza di biento mas banda di diabierna. Aruba su temporada di biento ta core for di Februari pa Augustus unda Juni tin mas biento. Meteo ta recomenda pa keda usa cautela riba lama grandi y adicional wak pa objectonan los no bula rond principalmente na cas.