Pa di shete biaha consecutivo, Biblioteca Nacional Aruba ta organisa e di shete Simposio Educativo di Sostenibilidad pa studiantenan di scolnan secundario avansa y superior.
Sr. Ronny Albertz ta splica cu pa dos siman largo for di 3 di September pa 14 di September, Biblioteca Nacional Aruba lo enfoca den educacion sostenibel. Scolnan di Aruba lo participa na Biblioteca Nacional Aruba. E di dos siman, esta 10 pa 14 di September, lo tuma luga un workshop di sostenibilidad unda cu studiantenan di Aruba for di edad di 6 pa 17 aña por inscribi y nan ta participa bou guia di pintor y artista di Colombia, sr. William Michaels Guerrero, kende lo duna e studiantenan como actividad pa traha artesania cu materialnan reciclabel. Dia 14 di September, nan mester entrega e artesania y esakinan lo wordo exponi na Biblioteca Nacional Aruba cu tambe ta duna hopi atencion na arte pa hopi aña largo caba.
E publico no lo keda afo. Ta bay tin un Anochi di Lectura na Cas di Cultura. E Anochi di Lectura ta pa publico en general y e tema lo ta Matanan Medicinal Local. Ta bay tin oradornan di Aruba y Corsou. Esakinan ta sra. Dina Verez, kende tin hopi conocemento riba e materia aki, y sr. Ciro Marquez, sr. Inger Croes, y sra. Olinda Rasmijn di Aruba. Sr. Albertz, den nomber di Biblioteca Nacional Aruba, ta extende un invitacion cordial na henter pueblo di Aruba pa bin e anochi aki, diaranson 5 di September for di 7’or di anochi pa 9’or di anochi. Entrada ta completamente gratis. Den Sala Unoca ta bay tin artesanonan cu ta bay bin pa ofrece nan productonan na benta. Biblioteca Nacional Aruba, Aruba Bank y Santa Rosa ta bay tin nan stand pa duna informacion riba e departamentonan importante aki. Biblioteca Nacional Aruba semper ta duna sosten na artesanonan local. Tambe lo tin oportunidad pa cumpra bukinan di sra. Dina Verez.
Sr. Albertz ta sigui splica cu shete aña pasa Biblioteca a concretisa e idea pa tene simposionan educativo di sostenibilidad, pasobra mundo ta draai riba sostenibilidad. Tin e parti di reciclahe y tin e parti ambiental cu nos mester siña cuida. E studiantenan ta e futuro di Aruba y nan hunto cu e scolnan, e dirigentenan, maestronan, Gobierno y Parlamento ta compronde cu sin sostenibilidad Aruba ta keda para. P’esey Biblioteca Nacional Aruba, como instituto educativo, ta pone enfasis riba e tema aki. Nan sa cu mayoria scol caba ta duna atencion na sostenibilidad. Tin hopi interes riba e parti di reciclahe. Ciudadanonan mester compronde cu por haci artesania cu e productonan aki. P’esey e workshop di sr. William Michael Guerrero ta importante, pasobra asina lo stimula y motiva e creatividad y concentracion di e studiantenan