Sra. Astrid Britten di Biblioteca Nacional Aruba ta duna di conoce cu pronto Biblioteca lo cuminsa adapta na un sistema digital.
Segun sra. Britten, Biblioteca Nacional no ta keda afo di e adaptacionnan tecnologico. Ta conoci cu Biblioteca tin dos bus den su disponibilidad. A yega na un acuerdo cu Fundacion Futura pa un di e busnan bira un Mobile Maker Space. E bus cu e sistema aki lo bishita diferente scolnan pa muchanan haci uzo di e servicionan tecnologico cu e bus lo ofrece, teniendo na cuenta e avanse tecnologico den enseñansa. Tambe lo trece un Biblio Maker Space na Biblioteca Nacional pa muchanan cu kier practica mas di locual nan a gusta den e Mobile Maker Space. Esaki ta posibel cu cooperacion di Metabolic Foundation. Biblioteca ta busca cooperacion cu diferente fundacionnan cu por yuda nan cu e proyectonan aki. Tin varios proyecto y evento plania pa luna di September, entre otro e simposio di sostenibilidad, y e introduccion di e Mobile Maker Space y e Biblio Maker Space. Ademas, sra. Britten ta mustra riba e posibilidad pa introduci un Biblio Maker Space na e Biblioteca di San Nicolas tambe.
Tambe sra. Britten ta duna di conoce cu Biblioteca Nacional ta den proceso pa ofrece e sistema di bukinan digital, pero alavez sin tin cu elemina e disponibilidad di bukinan normal cu ta keda esencial pa personanan cu no ta domina tecnologia bon.