Diasabra ultimo a tuma lugar na Centro di Bario Brazil Best of the Best Taekwondo Cup 2016 cu participacion for di Corsou, Venezuela y Surinam.
Un Centro di Bario yena cu bastante hende cu a asisti pa apoya e bringadornan.
Prensa tabata na grandi presente na pia di e mat pa asina nan no perde niun shot. Dr. Guaicaipuro Jimenez, Presidente di Aruba Taekwondo Bond a hiba un discurso pa asina duna e evento e inicio pa cuminsa.
Grand Master Chaco Jose Cornelio nos referee Olimpico a splica tur e coachnan e ultimo reglamentonan di World Taekwondo Federation y cu a wordo aplica na Best of the Best Taekwondo Cup 2016.
Un publico masha grandi mes for di Surinam, Venezuela, Corsou y Aruba mes a haci cu e sala di combate tabata yen yen. Tur a bin pa apoya nan atletanan.
Best of the Best 2016 a conta cu un nivel halto, mirando e nomber grandinan cu a participa na Best of the Best 2016. E atletanan di Aruba cu a clasifica por a bringa contra di e paisnan internacional. Best of the Best tabata inmenso y a pone cu e publico por a mira 29 pelea unda cu tabata tin solamente 1 knock out y dos pelea cu e referee mester a para debi di e diferencia di 12 punto.
Nos medionan di prensa cu tabata presente tabata; Bon Dia Aruba, Solo di Pueblo, Canal 22, Deporte den Accion di Tele Aruba y 297 Sports.
Un danki ta bay na tur nos medionan di prensa cu a bini y esnan cu no por a yega, pero cu semper ta coopera cu deporte.