Macramé ta un forma di arte. E ta un tecnica di obra di man, un manera di borda, trahando conopi cu cabuya sin ningun instrument, cu ta resulta den productonan decorativo y practico. Algun hende ta yama macramé e arte di traha conopi decorativo.
Tempo mi tabata staciona na Tripoli nos a mira macramé cu tabata wordo uza pa traha randnan decorativo pa e pañanan cu ta cubri lomba di camelnan. Mi señora Beatriz d.f.m. a keda masha intriga, pero e no a haya ningun hende pa siñe e arte. Macramé ta bin di un palabra “migramah” di e tehadonan Arabe di siglo 13 cu ta significa rand of fraña. Moronan a hiba e arte macramé pa Spaña y di aya el a plama den henter Europa. Marinonan a cuminsa haci macramé den nan tempo liber y tabata bende nan productonan caminda na tabata yega. Asina nan a hiba e arte aki pa tur skina di mundo.
Na 1974 cu nos a bay biba na New Jersey, macramé tabata gosa di un popularidad inmenso y mi señora Beatriz d.f.m. facilmente a haya un tayer caminda e por a siña e forma di arte.
Y con el a siña! El a bira un experto. Na 1979 nos a muda pa Miami y aya el a traha hopi hengel di colga mata rond di nos piscina. El a traha decoracionnan di Pasco, hengel pa botter di biña, macuto pa corant y revista di riba floer.
Na 1987 nos a muda bek pa Aruba y tabata dificil pa haya e cabuyanan necesario, pero e no a stop cu macramé. Ki ora cu nos bay Merca nos tabata trece cantidad grandi di cabuya, renchi di palo y metal, boton di decoracion, etc. Aunke macramé a cuminsa perde su popularidad na cuminsamento di e decada 1980, Beatriz a sigui cu su hobby te su morto na 2003. Apesar cu el a pasa su ultimo añanan riba rolstoel, e no a stop. El a haci macramé pa nos cas, pa nos yiunan y pa regala amigonan na tur parti di mundo: Na diferente estado na Merca, di Florida te California; na Canada, na Corsou, hasta na Australia.
Awendia e arte di macramé casi no ta wordo practica na Aruba, pero mi kier recorda cu un tempo tabatin un Arubiano, Beatriz Harms Lopez-Henriquez kende a laga un legado como un amante y experto den e arte perdí.
Skirbi pa Clyde Harms