Banco Central di Aruba (BCA) ta publica su FINANCIAL SECTOR SUPERVISION REPORT 2016.
Den e rapport aki, cu ta legalmente obligatorio, BCA, como e unico autoridad supervisorio di e sector financiero di Aruba, ta duna un bista di su actividadnan principal ehecuta y desicionnan mas importante tuma riba e tereno di maneho den e implementacion di e leynan supervisorio durante 2016, incluyendo e leynan pa preveni y combati labamento di placa y financiamento di terorismo. E rapport aki tambe ta describi e accionnan tuma pa reforsa e marco legislativo y regulatorio. Adicionalmente, tin un resumen di e desaroyonan reciente den e arena internacional supervisorio, como tambe un analisis di e desaroyonan principal den e sector financiero domestico.
Manera cu e tabata den e añanan anterior, e nucleo di BCA su actividadnan di supervision den 2016 a consisti di inspeccionnan periodicamente haci na e institucionnan bou supervision mes pa asina evalua e riesgonan mas grandi y e cumplimento cu e ley- y regulacionnan vigente, como tambe e vigilancia riba distancia (e asina yama “off-site surveillance”). E ultimo menciona ta inclui analisis di e rapportnan financiero cu e institucionnan bou supervision ta entrega periodicamente na BCA y e reunionnan bilateral teni cu e institucionnan supervisa. Ora cu ta considera necesario, BCA a aplica su instrumentonan supervisorio pa asina enforsa e cumplimento adecuado di e ley- y regulacionnan di supervision. Ta tuma pasonan formal den casonan unda cu BCA ta identifica situacionnan di no-cumplimento cu e ley- y regulacionnan di supervision. E decision pa aplica e pasonan formal ta depende entre otro di e gravedad di e caso. Na 2016, a tuma shete (7) pasonan formal en connexion cu incumpliemento cu e stipulacionnan poni den e ley- y regulacionnan aplicabel.
BCA ta implementa un enfoce basa riba riesgo, unda cu ta aloca e parti mas grandi di su recursonan supervisorio na e institucionnan cu e perfil mas halto di riesgo (basa riba BCA su mesun evalucacion di riesgo). E enfoce aki, hunto cu BCA su maneho estricto di enforsa y su compromiso continuo pa cumpli cu e normanan mas halto y e miho practica den e area di regulacion y supervision di e sector financiero, a bin ta instrumental den e mantencion di solides y reputacion di e sector financiero di Aruba.
E rapport di supervision di e sector financiero ta indica cu tambe durante 2016 e sector financiero domestico a keda solido, lucrativo, y sumamente resistente na shocknan externo. E tasanan prudencial agrega di e sectornan bou supervision a keda den e margennan adecua. E tasa di prestamonan den un situacion di incumplimento (e asina yama “nonperforming loans ratio”) di e banconan comercial a sigui baha, yegando na 4,4 porciento na final di 2016, for di 4,7 porciento na final di 2015. Mas ainda, e “stress tests” haci riba e sector bancario domestico a demostra cu e “risk-weighted capital ratio” y “prudential liquidity ratio”, cualnan tabata 27,9 porciento y 30,6 porciento, respectivamente, na final di 2016, ta mas cu adecua pa por absorba shocknan significante externo.
Cu e bista di sigui enforsa e marco di e prevencion y combatimento di labamento di placa y financiamento di terorismo y tambe pa prepara pa e proximo evaluacion di e Caribbean Action Task Force (CFATF) den 2021, BCA a haci un auto-evaluacion basa riba e recomendacionnan di FATF di 2012 cualnan ta cay dentro di su dominio pa asina identifica cualkier deficiencia cu por tin y pa asina traha riba un plan di accion pa por drecha e deficiencianan identifica. BCA tambe a haci un analisis di su deficiencia basa riba e normanan standarisa pa e trustkantoornan (e asina yama “Trust Companies Service Providers (TCSPs) Standards”) emiti door di e Group of International Finance Centre Supervisors (GIFCS) pa asina identifica areanan cu posiblemente lo mester di mehoracion en respecto cu e regimen supervisorio di BCA encuanto e trustkantoornan. E analisis aki a releva cu no tin deficiencianan significante.
E ampliacion di e red di supervision tambe a continua den 2016 cu e introduccion di e ordenansa di supervision di e mercado di balornan (e asina yama ”Landsverordening toezicht effectenverkeer”). Adicionalmente, tin otro propuestanan legislativo den mira cu tambe lo expande e mandato supervisorio di BCA den e area di e conducta di e mercado. A continuacion tin un resumen di e desaroyonan principal den e marco legislativo.
1.Mercado di balornan
E ordenansa di supervision di e mercado di balornan a drenta na vigor entrante prome di Januari 2017. E ley aki ta introduci un obligacion riba e operadornan di bolsa, manehadornan di cartera (‘portfolio managers’), schema di inversion colectivo, y operadornan di un bolsa di balor pa obtene un licensia (di BCA) y ta pone e partidonan menciona bou supervision continuo (di BCA). Mas ainda, e ley aki ta inclui condicionnan cu ta impone un obligacion di tin un prospecto p’e emision di papelnan di balor, y ta prohibi y sanciona e abuso di mercado (esta uso di informacion privilegia y manipulacion di mercado).
Credito na consumidor
BCA a entrega un concepto final encuanto e regulacion di credito na consumidor na Minister di Finansas y Organisacion Gubernamental na Juni 2016. Obhetivonan importante di e propuesta legislativo aki ta segura cu e consumidornan ta haya suficiente informacion prome cu nan sera un contract di fiansa, pone un limite na e tasanan di interes di e fiansa na consumidor, y preveni cu e consumidor ta fia di mas.
Garantia di deposito (“Deposit Insurance Scheme (DIS)”)
Riba peticion di Minister di Finansas y Organisacion Gubernamental, despues di un mocion pasa den Parlamento na 2014, BCA a prepara un concepto di ley cu lo introduci un garantia di deposito. BCA a entrega e concepto aki na Minister di Finansas y Organisacion Gubernamental riba 27 di Augustus 2015. Basa riba e comentarionan ricibi for di e Departamento di Legislacion y Asunto Huridico, na mei 2017 a entrega un concepto completamente revisa na Minister di Finansas y Organisacion Gubernamental, como tambe un propuesta di e decreto cu ta encera e modalidad di e garantia di deposito.
Oficina di cambio di divisa
Na Juli 2016, BCA a presenta un propuesta legislativo na Minister di Finansas y Organisacion Gubernamental pa amplia e alcance di “Landsverordening toezicht geldtransactiebedrijven” pa inclui oficinanan di cambio di divisa. Actualmente, ta regula e actividadnan aki den e “Landsverordening deviezenverkeer”, cual no ta provee suficiente instrumento pa por supervisa e oficinanan di cambio efectivamente. Pa e motibo aki, BCA tin un maneho di admision masha estricto unda a permiti solamente e banconan comercial pa por ehecuta e actividadnan di cambio di divisa. Mienstras tanto, Parlamento a pasa e ordinansa revisa y BCA ta anticipa cu esaki lo drenta na vigor pronto.
Den 2016, BCA a continua cu su esfuersonan pa enforsa e marco regulatorio door di emiti revision of introducion di regulacionnan. Den liña cu e normanan global di Basel III publica pa e Basel Committee on Banking Supervision, cu ta rekeri buffernan mas halto pa e capital y likides, BCA a dicidi di aumenta e minimo di e tasa di “risk-weighted solvency” di 14 porciento pa 16 porciento, cu a drenta na vigor entrante prome di Januari 2017. Ademas a aumenta e rekisitonan di reportahe pa e companianan di seguro y fondonan di pensioen.
Pa por cumpli adecuadamente cu e expansion den e mandato di supervision, BCA lo sigui inverti den personal cualifica y den entrenamento. Den cuadro di esaki, riba 1 di Januari 2017, BCA a establece un departamento nobo cu yama ‘Enforcement, Market Entry, Legal Advisory Department’. Tambe, lo sigui enfoca y automatisa e procesonan clave, pa aumenta eficiencia y efectividad di supervision.
Pa medio di enforsa estricto y consistente e ley- y regulacionnan di supervision y di e prevencion y combatimento di labamento di placa y financiamento di terorismo door di BCA den e transcurso di e ultimo añanan, a contribui na mantene un sistema financiero stabiel, reputabel y sano. Apesar di e resultado positivo aki, BCA no ta permiti espacio pa complaciencia. Manera e ultimo crisis financiero mundial a demonstra claramente, retonan supervisorio por surgi na cualkier momento. P’esey, BCA continuamente ta prepara su mes pa actua mesora y efectivamente asina e retonan supervisorio surgi.
E FINANCIAL SECTOR SUPERVISION REPORT 2016 ta disponibel for di awe riba e website di BCA www.cbaruba.org.