BONN, Alemania – E multinacional Aleman di productonan kimico y farmaceutico, Bayer a cuminsa e proceso di integracion di e agrokimico Monsanto, cual el a adkiri na comienso di juni. “E condicionnan pa cuminsa e proceso di integracion di Monsanto a wordo cumpli”, e farmaceutico a publica ariba su portal.
“E integracion di Monsanto den Grupo Bayer ya por cuminsa despues di e finalisacion di desinversion di Bayer den BASF di cierto negoshinan di Crop Science, cu’n volumen total di benta di rond di 2.2 miyon euro”, e comunicado ta bisa.
“Un di e rekisitonan di e Departamento di Husticia di Merca (pa e fusion di e dos companianan) tabata cu Bayer y Monsanto sigui di ta companianan separa y sigui opera di manera apart te ora cu nan cumpli cu desinversionnan den BASF, locual a wordo haci”, e farmaceutico a splica.
Di mes manera, e comunicado di Bayer ta sigura cu e “adkisicion di Monsanto ta duna espacio na un empresa agricola lider cu’n nivel halto di fortalesa innovador, un cartera di productonan solido y cu e standardnan di nivel etico di mas halto”.
Dia 7 di juni, e gigante Aleman di industria kimico farmaceutico Bayer, a cera e compra di e mulitnacional Mericano di simiya y fertilisantenan, Monsanto.
• Bayer a haci e compra mas grandi di su historia pa 54 biyon euro ( 64 biyon dollar), asesora pa e banco Mericano J.P. Morgan.
• E Departamento di Husticia Mericano a aproba e fusion di Bayer y Monsanto na mei ultimo cu’n serie di condicionnan.