WILLEMSTAD – Djárason 22 di febrüari 2017, alrededor di 15.45 or, Sentral di Polis a risibí yamada di un kaso kaminda un outo a pasa los bala riba un minimarket den Cubaweg.
Na yegada di polis na e sitio, nan a haña un kantidat di huls riba e kaminda ariba menshoná. For di investgashon preliminar a resultá ku probablemente un SUV koló shinishi ku algun persona den dje a pasa riba Cubaweg i na altura di un minimarket, kaminda tabata tin persona sinta parti pafó a los algun tiru den direkshon di e personanan aki.
Na e sitio polis no a haña niun viktima. Un pikòp ku tabata na e sitio a haña perforashon di bala. Te na e momentonan aki no sa e kousa di e losmentu di bala.
Investigashon den e kaso aki ta kontinuá.
Polis ta pidi kualkier persona ku por tin informashon tokante di e kaso aki pa pasa e informashon aki pa polis na e numbernan 917 i 108.