MESETAS, Colombia- Diamars, e grupo gueriyero FARC a conclui e proceso di abandono di arma. Cu esaki tambe ta yega un fin na nan lucha como grupo gueriyero y na su participacion den un conflicto violento cu a desangra e nacion Suramericano, durante 5 decada.
E entrega di e ultimo 40% di e total di armanan di e Fuerzas Armadas Revolucionarias de Colombia (FARC) a keda cumpli den e zona montañoso di Mesetas, den e parti zuidoost di e pais. Den e zona aki e grupo gueriyero pa decadanan largo a eherce e trabao di un gobierno de facto, desafiando estado Colombiano. Awor nan lo bira un partido politico.
E mision di ONU na Colombia a informa cu ya nan a ricibi y a warda e containernan cu mas di 7 mil arma, cual den su mayoria tabata parti di e arsenal di FARC cu tabata den poder di e combatientenan rebelde, cumpliendo e acuerdo entre gobierno y gueriya, pa caba cu e conflicto cu a laga mas di 220 mil hende morto.
Casi 7 mil integrante di FARC, ademas di mas di shen colaborado acutalmente ta permanece den 26 luga mei mei di selva y ceronan, bou di supervision di ONU, como parti previo na nan reincorporacion na e bida civil.
Presidente di Colombia, Juan Manuel Santos a yega te den e zona transitorio di normalisacion hunto cu e maximo lider di FARC, Rodrigo Londoño, alias “Timochenko”.
“Nos no a faya Colombia, awe nos ta bandona e armanan. Ayo na e armanan, ayo na e guerra, y nos ta yama bon bini na e paz”, segun e maximo dirigente di e grupo rebelde, Rodrigo Londoño, alias “Timochenko”.
Ademas di bandona e armanan, e acuerdo di paz ta inclui e entrega di tera na campesinonan pober, lucha contra di narcotrafico y inversion social di estado den educacion, salud, carretera pa caba cu pobresa, cual implementeacion lo dura por lo menos un decada y cu ta enfrenta e oposicion di un amplio sector di e sociedad.
Pero pa logra un paz completo na Colombia, Santos, ganado di e Premio Nobel di Paz na 2016, ta buscando un acuerdo cu e Ehercito di Liberacion Nacional (ELN) a trabes di un negociacion cu ta wordo realisa na Ecuador, mientras cu e ta enfrenta militarmente e bandanan criminal cu ta consisti di ex- paramilitarnan di ultraderecha y cu ta dedica na narcotrafico.
Fuente: www.lta.reuters.com