Amsterdam, HULANDA- Amsterdam Trade Bank y ING Groep NV ta dos di e 732 banconan cu ta wordo uza door di criminalnan Ruso pa laba placa. Esaki a wordo divulga door di OCCRP, un cooperacion mundial di periodistanan investigativo. E mesun organisacion aki ta responsabel pa e publicacionnan di Panama Papers.
Ta trata aki di un total di 19 miljard euro cu a wordo laba entre Januari 2011 y October 2014. E fluho di placa ta wordo gelink na un network yama “Global Laundromat” of e “wasmachine mundial”. E banco Britanico HSBC a wordo uza pa 545 miyon dollar via un branch di e banco na Hong Kong. ING Groep NV lo ta responsabel pa a laba 2.4 miyon dollar. E suma di Amsterdam Trade Bank ainda no ta conoci.
Hopi banco nombra den The Guardian tin un politica estrico pa evita labamento di placa, pero segun e corant Britanico, niun hende a haci pregunta tocante e veracidad di e documentonan.