ALEMANIA – E banco Aleman cu a fia 300 miyon di dollar na Donald Trump a hunta un papel prominente na e escandalo di labamento di placa, efectua pa criminalnan Ruso, cu lasonan na Kremlin, e website di noticia The Guardian a revela.
Deutsche Bank ta un di e hopi institucionnan financiero occiental cu a procesa por lo menos 20 biyon di dollar – y posiblemente mas – den placa di “origen criminal” for di Rusia.
E caso, yama “the Global Laudromat”, a core for di 2010 te cu 2014.
Agencianan hudicial ta investigando con un grupo di Ruso politicamente bon conecta tabata por a uza companianan registra na Reino Uni, pa laba biyones di dollar cash. E companianan tabata haci financiamentonan ficticio na otro, bao di negoshinan Ruso.
E companianan lo default riba e ‘debenan’ aki. Huesnan na Moldova e ora ta dicta sentencianan enforsa contra e firmanan. Esaki tabata permiti cuentanan di banco Ruso pa transferi sumanan grandi pa Moldova legalmente. For di eynan, e placa lo bay riba cuentanan na Latvia cu Trasta Komercsbanka.
Deutsche, e fiado mas grandi di Alemania, a actua como un “banco coresponsal” pa Trasta te cu 2015. Esaki ta nifica cu Deutsche a provee servicionan di dollar denomina na clientenan Ruso no residente di Trasta. E servicio aki a wordo uza pa move placa for di Latvia pa banconan rond mundo.
Durante e periodo aki hopi banco di Wallstreet a bay pa Latvia, citando preocupacionnan cu e pais chikito Baltico aki a bira un centro pa labamento di placa internacional, specialmente for di Rusia.
Na 2013, bao di presion regulatorio Mericano, JP Morgan Chase a stop di provee dollar clearing service pa e pais.
For di 2014, solamente dos fiado occidental tabata dispuesto pa acepta transferencianan internacional di dollar for di banconan di Latvia. Nan tabata Deutsche y Commerzbank di Alemania. Deutsche eventaulmente a hala tras cu servicionan corespondiende na Trasta Bank na September 2015.
Seis luna despues, e regulatorio Latvio, a cera e banco. Nan a cita varios violacion, y a bisa cu e banco a faya den deal cu e riesgo di labamento di placa.
E vice minister di finansas di Latvia, Maija Treija, a bisa cu e placa manda via Trasa, sea “ta hortal of cu origen criminal.”
E banco a wordo uza como vehiculo pa saca placa for di e ex-Union Sovietica y “den e sistema financiero di Union Europeo,” el a agrega.
Deutsche a bisa cu e tin fortalese su sistema y controlnan significantemente.
Deutsche Bank a caba cu su relacion cu Tasta despues cu regulacionnan di Latvia a manda un advertencia. Na Augustus 2015, e Comision financiero y mercadonan capital, a para tur transaccion riba €100,000.
Deutsche a caba su relacion cu e otro banco principal pa labamento di placa – Moldindconbank di Moldova, na 2012.
Lasonan cu Rusia ta un cuestion di sensitividad agudo pa Deutsche. Na Februari, a bin sali na cla cu Deutsche secretamente a revisa varios financiamento haci na Presidente Trump pa su division priva pa mira si tin un conexion cu Rusia. Trump debe Deutsche mas of menos $300 miyon. Deutsche a nenta di cmenta riba e revision interno. Fuentenan ta bisa cu e banco a descubri cu no tin evidencia di ningun ligamento cu Moscu. Esey ta cubri otro miembronan di e famia di e presidente Mericano cu ta clientenan tambe di Deutsche. Esey ta inclui e yiu muhe di Trump, Ivanka, su casa, Jared Kushner, y e mama di Kushner, Seryl Stadtmauer.
Fuente: The Guardian