Durante e reunion di dia 2 di Februari 2017 e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki.
Reservanan internacional
E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di December 2016. Ambos a registra aumentonan di, respectivamente, Afl. 281,5 miyon (+17,5 porciento) y Afl. 193,3 miyon (+13,1 porciento), compara cu December 2015. Consecuentemente, e reservanan internacional a yega Afl. 1.952,2 miyon na fin di December 2016.
Desaroyonan den credito
E total di credito di e banconan comercial a mustra un aumento (+2,5 porciento) na final di December 2016 compara cu December 2015. Credito na empresa y fiansa pa construccion di cas a aumenta cu 1,2 porciento y 4,6 porciento, respectivamente, mientras cu credito na consumidor a baha cu 4,8 porciento.
Inflacion
Na December 2016 a registra deflacion den e tasa di inflacion compara cu e aña anterior (−0,3 porciento) como tambe den e promedio anual di inflacion (−0,9 porciento). E ultimo ta principalmente causa pa prijsnan mas abou di gasolin y un bahada den e tarifa di coriente na Januari 2016. E promedio di inflacion ora exclui e componentenan di cuminda y energia a subi na 0,5 porciento, primordialmente reflehando un aumento den e componente di vivienda di e Indici di Prijs di Consumo.
Turismo
Durante 2016, indicadornan di turismo a mustra señalnan di debilidad, como cu a nota caidanan den e cantidad di anochinan permaneci na Aruba (−4,3 porciento), ingresonan turistico registra na banconan comercial (−3,2 porciento) y e cantidad di bishitantenan (−10,0 porciento), compara cu 2015. Un excepcion na e desaroyonan negativo aki ta un subida registra den e cantidad di turistanan crucero (+8,1 porciento).
Placa den circulacion
Na December 2016 e cantidad di placa den circulacion a subi cu Afl. 93,0 miyon te na Afl. 4.166,4 miyon, compara cu e luna anterior. Esaki a resulta for di un aumento den e activo domestico neto (+Afl. 102,4 miyon), parcialmente mitiga pa un caida den e reserva di divisa neto (+Afl. 9,4 miyon). Mientras cu e subida den e activo domestico neto a resulta door di tanto e credito domestico (Afl. 98,1 miyon) como cu transaccionnan no relata na credito (+Afl. 4,3 miyon), e caida den e reserva di divisa neto di e sector bancario tabata debi na e benta neto di divisa di Afl. 213,7 miyon na publico. Esaki tabata primordialmente en conexion cu pagonan neto pa e importacion di bienes, inversion di portfolio, otro servicio y otro inversionnan, cual a wordo mitiga pa e compra neto di divisa di Afl. 204,3 miyon for di publico, principalmente asocia cu turismo, transaccionnan di capital y transfarencia neto for di cuentanan den exterior di companianan local.
Mercado financiero
Na December 2016 a nota un aumento den e promedio di interes riba depositonan nobo (+0,4 punto di porcentahe te na 2,0 porciento), mientras cu un bahada a wordo registra den e promedio di interes riba prestamonan nobo (−1,0 punto di porcentahe te na 6,9 porciento), compara cu e luna anterior. Consecuentemente, e margen di e tasa di interes a cai cu 1,5 punto di porcentahe te na 4,8 porciento.
Advance rate
E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,46 punto di porcentahe na December 2016. Consecuentemente, no tabata tin rason pa cambia e “advance rate” di BCA.