Durante e reunion di dia 24 di mei 2018, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien, cu ta disponibel. A considera e siguiente informacion y analisis den e proceso pa yega na e decision aki, basa riba data di maart 2018.
Reservanan internacional
E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua, a base di normanan aplica. Tanto e reservanan oficial di divisa (+3,3 porciento) como e reserva internacional di divisa (+5,3 porciento) a registra aumento na maart 2018, compara cu december 2017 (Grafiek 1). Consecuentemente, e reservanan internacional y e reservanan oficial a yega, respectivamente, te na Afl. 1.884,9 miyon y Afl. 1.736,5 miyon na fin di maart 2018.
Desaroyonan den credito
E crecemento di credito total dentro di e sector di banconan comercial a permanece sin cambio (0,0 porciento) compara cu december 2017. A contraresta e caida den credito na empresa (−0,9 porciento) door di crecemento den credito na individuonan (+0,3 porciento) y otro credito (+1,3 porciento), resultando den un crecemento di zero pa credito total. Un subida den fiansa pa construccion di cas a impulsa e aumento den prestamonan personal, parcialmente mitiga pa un caida den credito na consumidor. Primordialmente un bahada den e asina yama ‘term loans’ cu un termino di vencemento mas largo cu dos aña a afecta credito na empresa.
Inflacion
A registra subida den tanto e prijsnan compara cu e aña anterior (2,6 porciento), como den e promedio anual di inflacion (0,0 porciento), manera midi den e Indice di Prijs di Consumo (CPI). Ambos crecemento ta principalmente causa door di un aumento den e componentenan di transporte y cuminda. E promedio di inflacion ora exclui e componentenan di cuminda y energia a yega na 0,4 porciento, principalmente reflehando un aumento den e componentenan di vivienda, educacion, transporte, y hotel y restaurant.
Turismo
Durante e prome tres lunanan di 2018, e desaroyo den e indicadornan di turismo a registra crecemento, ya cu a nota expansionnan den e cantidad di bishitantenan (+4,3 porciento), anochinan permaneci (+5,0 porciento), cantidad di turistanan crucero (+9,9 porciento) y den e entradanan turistico registra na banconan comercial (+11,2 porciento), reflehando e crecemento solido den e mercado Mericano.
Placa den circulacion
Cantidad di placa den circulacion a registra un subida di Afl. 54,4 miyon te na Afl. 4.386,9 miyon, compara cu e luna anterior. E ultimo ta debi na un aumento den e activo domestico di neto (+Afl. 81,6 miyon) y un caida den e reserva di divisa neto (−Afl. 27,2 miyon). E aumento den e componente domestico di placa den circulacion ta atribui na un expansion den credito domestico (+Afl. 73,3 miyon) y den transaccionnan no relata na credito (+Afl. 8,3 miyon). Di otro banda, e reserva di divisa neto a mengua principalmente door di transaccionnan relaciona cu pagonan pa importacion di mercancia, transferencianan neto pa cuentanan externo, transferencianan coriente, pagonan di entrada y otro servicionan. Entrada for di actividadnan di turismo a mitiga esaki pa gran parti.
Mercado financiero
A registra expansion den e averahe di interes riba prestamonan nobo (+0,5 punto di porcentahe te na 7,2 porciento) y den e averahe di interes riba depositonan nobo (+0,6 punto di porcentahe te na 2,0 porciento), compara cu e luna anterior. Consecuentemente, e averahe den e margen di e tasa di interes riba prestamonan y depositonan nobo a baha cu 0,1 punto di porcentahe te na 5,2 porciento.
Advance rate
E “advance rate” di BCA a keda stabiel. E margen entre e “advance rate” di BCA y e “Federal Funds rate” tabata 0,51 punto di porcentahe na maart 2018.