Banco Central: Reserva di Divisa a subi

0

Desaroyo monetario
Den e luna di Januari 2018, e cantidad di placa den circulacion a subi cu Afl. 43,6 miyon te na Afl. 4.283,5 miyon, compara cu December 2017. Esaki a resulta for di crecemento den e reserva di divisa netto di Afl. 63,3 miyon, cual a wordo parcialmente mitiga pa un caida den e activo domestico netto di Afl. 19,7 miyon.

E subida den e reserva di divisa netto di e sector bancario a resulta for di compra netto di divisa for di publico (+Afl. 254,0 miyon), primordialmente relaciona cu entrada for di turismo, servicio di transportacion y inversion directo. Esaki a wordo parcialmente mitiga pa benta netto di divisa na publico (-Afl. 190,7 miyon), principalmente relaciona cu importacion di mercancia, otro servicionan, transferencia netto pa cuentanan den exterior di companianan local, transferencia coriente y e asina yama “income accounts”.

E bahada den e activo domestico netto ta debi na un caida den transaccionnan no relata na credito (-Afl. 23,3 miyon). Di otro banda, credito domestico a registra un aumento di Afl. 3,6 miyon. E bahada den transaccionnan no relata na credito ta mas tanto relaciona cu caida den e asina yama “allocated provisions for loan losses”, e asina yama “acounts receivable and prepayments”, otro debenan, un subida den e asina yama “shareholders’ equity” y transaccionnan di clearing. Credito domestico a aumenta door di mas credito bancario netto na e sector publico (+Afl. 10,0 miyon), cual a wordo mitiga pa un bahada den credito bancario na e sector priva (-Afl. 6,4 miyon). E bahada den credito bancario na e sector priva ta debi na menos credito na consumidor (-Afl. 7,2 miyon) y credito na empresa (-Afl. 1,9 miyon). Di otro banda, hipoteca pa vivienda a nota un subida di Afl. 2,6 miyon. Di otro banda, credito bancario netto na e sector publico a nota un aumento, principalmente door di un vahada den depositonan di gobierno (-Afl. 9,9 miyon).

Inflacion
E nivel general di prijs, cu ta wordo midi door di e indice di prijs di consumo, a registra un subida di 1,1 porciento den e luna di Januari 2018, compara cu Januari 2017. E contribuyente principal na e aumento aki ta e componente “Transporte”. Otro componentenan cu tambe a registra aumento ta e componentenan “Cuminda y Bebida No-Alcoholico”, “Vivienda”, “Recreacion y Cultura” y “Restaurant y Hotel”. Di otro banda, e componentenan “Paña y Sapato” y “Mobilario” a registra un caida. Si exclui e componentenan di cuminda y energia for di e indice di prijs di consumo, inflacion a mustra un aumento di 0,7 porciento compara cu Januari 2017. Pa loke ta trata e promedio anual di e tasa di inflacion, esaki a regsistra un bahada di 0,4 porciento na Januari 2018, compara cu un caida di 0,5 porciento na December 2017.

Turismo
Na Januari 2018, e cantidad di turista a registra 757.183 bishitante, cual ta 2.202 bishitante (+2,5 porciento) mas cu na Januari 2017. E crecemento aki a resulta principalmente door di un expansion den e mercado Norte Americano di 5.104 bishitante (+8,3 porciento), cual a wordo pa un gran parti mitiga pa un reduccion den e mercado Latino Americano di 3.290 bishitante (-18,1 porciento).

E subida den e mercado Norte Americano a resulta principalmente door di mas bishitante for di Merca (+4.097 bishitante of +7,4 porciento). E caida den e mercado Latino Americano a wordo causa primordialmente pa menos bishitante for di Venezuela (-4.333 bishitante of -48,9 porciento).

E cantidad di turista crucero a registra un aumento di 18.564 bishitante of 20,7 porciento te na 108.298 bishitante na Januari 2018, compara cu Januari 2017. E cantidad di barconan a expande for di 44 na Januari 2017 pa 53 na Januari 2018.

Entrada di Gobierno
Na Januari 2018, entrada di gobierno a suma Afl. 100,4 miyon, cual ta Afl. 3,2 miyon mas compara cu e mesun luna di e aña anterior. Esaki a resulta for di un aumento den entrada di impuesto (+Afl. 7,8 miyon), cual a wordo parcialmente mitiga pa un caida den entrada no relata na impuesto (-Afl. 4,6miyon).
E subida den entrada di impuesto ta relata principalmente na mas impuesto riba importacion (+Afl. 2,8 miyon), impuesto riba entrada (+Afl. 2,3 miyon), benta di negoshi (B.B.O.) (+Afl. 1,9 miyon), impuesto riba propiedad (+Afl. 1,0 miyon) y e asina yama “overdrachtsbelasting” (+Afl. 1,0 miyon). E subidanan aki a wordo parcialmente mitiga pa menos impuesto riba ganashi (-Afl. 1,4 miyon) y impuesto riba divisa (-Afl. 1,0 miyon).

Banco Central di Aruba
22 May 2018

Comments

comments