Awe Banco Central di Aruba (BCA) a publica e raport“ Fostering Financial Stability. A Policy Report”, den cual ta discuti extensivamente desaroyonan internacional riba e tereno di stabilidad financiero y con por fomenta stabilidad financiero na Aruba.
Hecho ta cu internacionalmente gobiernonan, desaroyonan y innovacionnan economico ta influencia sistemanan financiero. Mas y mas, e influencia aki ta aumenta door di e lasonan estrecho y conectividad digital entre finansa publico, institutonan financiero, mercadonan y hogarnan.
Na prome instancia, discusion y estudionan internacional riba e stabilidad financiero a enfoca principalmente riba identificacion di riesgonan y e medidanan adecua, manera regulacion macroprudencial, pa asina fortifica e capacidad pa recuperacion di e sistema financiero. Den cuadro di e recien crisis financiero y recesion economico, stabilidad financiero a surgi como un di e retonan mas importante pa gobiernonan y autoridadnan financiero. Un acercamento sistematico unda ambos sector priva y sector publico ta responsabel pa genera stabilidad y resistencia financiero ta un tema importante di e raport aki.
Como BCA tin den su mandato provee e stabilidad monetario y promove solides di e sector financiero, e raport “Fostering Financial Stability. A Policy Report” ta discuti diferente strategianan con pa tambe contribui na stabilidad financiero. Basa riba analisis y ‘best practices’ internacional, ta comparti algun lesnan importante y ta brinda recomendacionnan con pa fomenta stabilidad financiero na un forma structural den nos pais Aruba. E publicacion ta obtenibel riba e website di BCA: www.cbaruba.org.