Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua den gran forma. Den categoria AA masculino e ekipo di Balashi Premuim kende a caba di bautisa nan uniform nobo recientemente a sa di sali riba bon pia pa locual ta trata campeonato oficial di Aruba Softball Bond. E hoben pitcher prometedor den desaroyo Giancarlos Gomez ta lansa un “No Hit No Run” contra Piratas pa asina seya e promer victoria riba su nomber. E veterano Johannes “Poy” Flanegin kende a reforsa e equipo Piratas cu a titula campeon 2016 y a subi pa AA a bay cas cu e derota. Balashi Premuim 4 careda, 8 hit, 1 error. Piratas 0 careda, 0 hit, 2 error. Mihor bateadornan pa Balashi Premuim a resulta Nathan Berkel 3-3, Sando Geerman y Marc Danies ambos di 2-1. Den e di dos wega pa completa e doublé header di anochi Piratas a mustra mucho mas miho y a faha e hobennan di Balashi fuertisimo pero no por a bin cla pa comberti esaki den un victoria. Balashi hungando bon bala ta seya nan di dos victoria di anochi. Balashi Premuim 9 careda, 13 hit, 2 error. Piratas 7 careda, 7 hit, 2 error. Jorge Santana ta bay henter e ruta y ta resulta pitcher ganado mientras Guillermo Montiel ta bay cas cu e derota. Miho bateadonan pa Balashi ta Nathan Berkel di 4-3 kende ta start campeonato “super hot” cu 6 hit den 7 turno den promer dos weganan, Gerald werleman tambe a bay di 4-3. Juan Arango y Djurwin Croes ambos di Balashi a conecta un cuadrangular. Pa Piratas a destaca na bate den causa perdi Jonathan Perez 3-3 y Ramon Gonzalez di 2-1. Campeonato ta continua Diasabra atardi 5pm na Pos Chiquito cu 2 wega femenino y ta continua diadomingo mainta 11am na Kudawecha cu 2 wega Femenino mientras dialuna 29 di Mei pa 7:15pm na Pos Chiquito lo bay tin 2 wega valido den categoría A-Klas masculino. Pues campeonato di Aruba Softball Bond den pleno desaroyo.