ROMA, Italia- Cuerponan di Bombero Italiano durante nan operacion di rescate a logra saca algun mucha for di bou di e ruinanan despues di e temblor ariba e isla Ischia. E informacion aki a wordo confrima door di e hefe di bombero. El a sigui bisa cu nan tin contacto cu e muchanan cu ta bou di e ruinanan.
“Nos ta tende nan stem y door di papia cu nan, nos ta purba di calmanan”, segun e vocero. E oficinan di prensa Italiano ANSA a informa cu entre tanto a logra pa awa a yega te na unda e muchanan ta. E temblor ariba e isla dilanti di e costanan di Napoles tabata tin un intensidad di 4.3. Esaki a ocasiona por lo menos dos morto y decenas di persona a keda herida.
Door di miedo pa aftershock, hopi ta e turistanan cu kier bandona e isla. Den oranan di anochi pa marduga, autoridadnan a pone varios boto disponibel pa e turistanan cu kier bandona e isla.
Tambe den oranan di anochi, bomberonan a logra na saca un baby di shete luna for bou di e ruinanan.