MONTANA, Merca- Un baby di cinco luna a wordo rescata for di e ceronan di e condado di Missoula, den estado di Montana, Merca. Esaki despues di cu el a keda casi nuebe hora dera.
E baby a wordo haya pa 2 or y 30 di diadomingo pa un polis cu a skucha e baby ta yora y “a sigui e zonido”. E baby (mucha homber) tabata “boca abao, dera bou di un cero di palo y piedra, bisti cu’n jumper sushi y muha”, e comunicado di e oficina di e comisario di condado di Missoula, publica ariba Facebook cu ta precisa cu e temperatura na unda e mucha tabata dera tabata di 46 grado Fahrenheit (mas o menos 7 grado Celsius). E baby a wordo hiba pa un hospital local y ta “den bon condicion”, segun autoridadnan.
E RESPONSABEL
E drama aki a cuminsa diasabra ultimo, ora cu polis di Missoula a ricibi yamada di varios testigo tocante un homber cu actuacion straño den e zona di Lolo Hot Springs.
Testigonan a relata cu e “sospechoso” tabata menasando e hendenan bisando cu e tabata tin un arma y cu e tabata buscando esaki den su saco”, e comunicado di polis ta sigui bisa.
Autoridadnan a yega na e luga, pero a descubri cu e homber, cu a wordo identifica como Francis Carlton Crowley, di 32 aña, a bandona e zona. Pero ademas, nan a haya sa cu “un baby di cinco luna cu a wordo laga pa e cuida ya tin varios hora cu nan no ta wak e criatura”.
Mas laat, Crowley a wordo aresta cerca di un fontein. Den interogacion, aunke cu tabata parce cu e tabata bou di influencia di droga”, su declaracionnan a indica cu el a laga e baby den e seronan. Polisnan, cu yudansa di otro rescatistanan a cuminsa un buskeda fuerte, cu afortunadamente, a termina ora cu a haya e baby cu bida.
Crowley a wordo acusa di pone e bida di e criatura na peliger, pero por spera mas cargo den su contra.