Tur dokter tin un contract cu AZV pa ora cu mester duna servicio na e clientenan cu e mester cumpli y ora un keho drenta AZV ta trat’e di biaha. Sra. Solange Tchong, vocero di AZV ta splica.
Den e contract ta palabra e cantidad di horanan cu mester tin disponibel pa consulta un pashent y horarionan cu e dokternan mester tin disponibel pa skirbi receta y wak resultadonan etc. tin cierto restriccionnan mara den contrato, pero tambe tin cierto expectativanan tambe di e dunado di cuido.
Sra. Tchong ta sigui bisa cu ta trata aki di profesionalnan cu a studia 8 pa 10 aña y tin ora mas cu esey. Tin otro proyectonan unda cu AZV a purba yuda e parti di servicio. P.e. cu introduccion hunto cu Wit Gele Kruis, AZV a bin cu e Praktijkondersteuning, cual ta un forma unda ta yuda e servicio. Y no solamente e servicio cu ta wordo duna, pero tambe e parti di e guia di e pashentnan mes cu ta diabetico.
Esey ta un forma unda AZV a yuda, cu a bay hasta over di amplia e cantidad di Praktijkondersteuningnan. Un consultorio cu tin un praktijkondersteuning, kisas lo haya su afspraak mas lihe, pero hasta e lo haya un miho guia si e ta un persona cu malesa cronico. Dus eynan, segun Sra. Tchong, AZV a yuda.
Un otro forma cu nan a yuda, ta pa dokternan di cas tin miho ekipo pa traha cun’e. No solamente a introduci e sistema di Pro- Medico, pero tambe otro cosnan tambe. Tin algun oficina ta traha cu e sistema di triage, cu ta traha cu e sistema di ProMedico. Bo ta siña categorisa a base di e sintomanan cu e pashent ta informa, bo ta siña categorisa e urgencia. Cual pashent e dokter mester atende mas prome.
AZV eigenlijk ta yuda e dunado di cuido pa mehora e servicio, pero e miho manera ta cu AZV hunto cu e Asociacion di e dokter di Cas, ta con lo bay uniforma e proceso di traha. Na unda nan kier yega ta un sistema, unda cu no ta importa na cua dokter di cas, e pashent ta inscribi, pero tin p.e. Un solo forma di traha. Y tur hende sa, cu entre 7 or pa 9 or por yama pa un receta of un afspraak. Esey ta un caminda unda AZV kier bay. Pero esaki ta tuma tempo, ya cu mester evalua tur e componentenan cu ta sosode dentro di un oficina di dokter. Ora bo tin un bon bista, con nan ta trahando actualmente, e ora por bay over na e cambionan.
AZV ta haciendo esaki y nan ta spera cu pronto nan por duna publico e informacion aki unda cu partidonan por yega na un solo forma di traha. Asina Sra. Solange Tchong, vocero di AZV a informa.